Директорот на Агенцијата за млади и спорт најави дека ќе побара од Владата да се преполоват цените на услугите во спортските објекти што се под надлежност на државни или општински институции
Владата вчера донесе уредба со која се утврдува исплаќање на финансиска поддршка од буџетот во износ од 14.500 денари за спортистите, стручните лица и спортската администрација за април и мај годинава. Исплатата ќе се врши врз основа на статус на вработено или ангажирано по договор лице во клубови и национални спортски федерации кои имаат решенија за вршење дејност спорт. Со неа ќе бидат опфатени сите лица кои со каков било договор се ангажирани во федерациите и во клубовите, информира директорот на Агенцијата за млади и спорт Дарко Каевски.
„Вонредните времиња, бараат вонредни мерки. Токму затоа во изминатите недели бевме насочени кон креирање пакет мерки и уредба која ќе помогне спортот да се одржи во вакви тешки времиња. Ова е главна мерка која значи директна помош од 14.500 денари за април и мај, средства наменети директно за спортистите и спортските работници со цел да се зачуваат нивните работни мести и олеснување на работниот процес во овие кризни времиња“,
рече Каевески на денешата прес-конференција во Владата.
Покрај оваа мерка, додаде, креиравме и дополнителен пакет мерки, со кои, како што рече, веруваме дека ќе се олесни работата и функционирањето на клубовите во оваа тешка состојба.
„Помош за април и мај во износ од по 14.500 денари од АМС ќе добијат сите клубови кои имаат регистрирано минимум 40 млади спортисти до 18 години во индивидуалните спортови, односно имаат регистрирано минимум 80 млади спортисти до 18 години во екипните спортови. АМС ќе обезбеди финансиски средства за реализација на националниот спортски систем на сите национални спортски федерации по завршувањето на кризата до крајот на 2020 година. По завршувањето на пандемијата, АМС покрај редовната поддршка ќе ги финансира програмите на индивидуалните врвни спортисти на олимписките спортови, односно тренажниот и натпреварувачкиот процес за 2020 година“,
рече Кавески.
Посочи дека АМС ќе поднесе предлог до Владата за 50 проценти процентно намалување на цените на услугите за спортските објекти што се во надлежност на институциите, како и препорака за истиот принцип на функционирање до општините и локалната самоуправа.