„Пломба“ на кафе-барот „Интермецо“ поради синоќешната журка

Во скопското кафуле се правела забава со познат ди-џеј на која присуствувале повеќе лица од дозволеното според протоколите

Државниот пазарен инспекторат синоќа го затвори скопскиот бар „Интермецо“ поради непочитувања на протоколите и рестриктивните мерки.

Според ДПИ, пазарните инспектори синоќа влегле во објектот и постепено го испразниле, бидејќи е констатирано непочитување на мерките согласно одлуката на Владата за ковид-протоколите.

Во скопското кафуле се правела забава со познат ди-џеј на која присуствувале повеќе лица од дозволеното според протоколите кои се препорачани од Владата. Објектот, согласно важечките прописи, добива забрана за вршење на угостителска дејност во наредните 10 – 30 дена како и парична казна.

Ова не е првпат кафулето „Интермецо“ да биде затворено. Лани во октомври, доби забрана за работа од 30 дена поради пуштање гласна музика, но сопствениците си ја тргнаа пломбата. Потоа од Општина Центар поднесоа кривична пријава, а Обвинителството предложи казна од 5 000 евра за тргање на пломбата.

Поради отстранување на пломбата, ОЈО Скопје бара 5 000 евра казна за „Интермецо“

Ова кафуле во јули годинава од локалните инспектори на Општина Центар доби решение заедно со „Гнездо“ во центарот на Скопје, поради надминување на граничните вредности на бучава.

Општина Центар со решенија против „Гнездо“ и „Интермецо“ поради гласна музика