Основното јавно обвинителство Скопје бара казна од 5 000 евра за отстранувањето на пломбата од кафе-барот „Интермецо“ во Скопје. Обвинетиот управител се товари за делото симнување и оштетување службен печат.
„Знакот бил поставен заради осигурување на објектот, а врз основа на донесено Решение за забрана за вршење угостителска дејност во рок од 30 дена, откако со мерења било утврдено дека угостителскиот објект емитувал ниво на бучава над пропишаните гранични вредности. Обвинетиот го отстранил службениот знак за запечатување на локалот, влегол во објектот и продолжил со вршење на дејноста“,
велат од Обвинителството.
За овој случај пред една недела градоначалникот на Центар, Саша Богдановиќ, поднесе кривична пријава.
Денешното барање на казна, како и кривичната од Богдановиќ претходно, следуваа откако „Интермецо“ претходно веќе доби казна за гласна музика.
Еднаш му беше изречена казна од 6 000 евра, а потоа следуваше уште една иста глоба. Со втората казна следуваше и пломбата на вратата заради забраната за работа во траење од 30 дена, која од кафе-барот не ја почитуваа.