Минатата недела здравствените власти изразија стравување дека ќе мора да го запрат процесот на вакцинација, поради недостаток на вакцини, додека Полска и Италија најавија тужби против производителите
Хрватскиот премиер Андреј Пленковиќ оцени дека дипломатијата околу вакцините против ковид-19 се претвора во нивно киднапирање, со тоа што нив ги добиваат онои кои ќе платат повеќе.
Ваквите обвинувања тој ги изнесе на прес-конференција во Загреб.
„Реков дека дипломатијата за вакцините ќе биде главна синтагма и главна задача на почетокот на годинава. Сега тоа во еден дел се претвора во киднапирање, односно оние кои се подготвени да плаќаат повеќе за доза, отколку што платила Унијата“,
рече тој.
Хрватскиот премиер истакна дека „се случуваат одредени активности кои се надвор од договореното“ и посочи дека ќе инсистира на почитување на тие договори.
Во врска со проблемите околу испорака на вакцините, тој потсети дека сите лидери на ЕУ изразија многу силен став дека треба да се почитува планираната динамика на испорака и дека ЕУ вложила огромни средства во фармацевтски компании во процесот на истражување на вакцините.
На прашањето за евентуални тужби против производителите на вакцини, доколку тие не ги исполнат своите обврски, Пленковиќ одговори дека тоа ќе биде заедничка активност на ниво на ЕУ, бидејќи ЕК е страна во договорот, додавајќи дека „е опција да се искористат сите средства за исполнување на договорните обврски “.
Хрватскиот премиер, исто така, посочи дека втората доза од вакцината ќе биде обезбедена на време за оние кои ја примиле првата.
Хрватска порача речиси шест милиони дози вакцини од различни производители преку ЕУ – еден милион дози од „Фајзер/Бионтек“ и „Модерна“, 2,7 милиони од „АстраЗенека“, 900 000 дози од „Џонсон & Џонсон“ и 300 000 од „КјурВак“.
Минатата недела здравствените власти изразија стравување дека ќе мора да го запрат процесот на вакцинација, поради недостаток на вакцини, додека Полска и Италија најавија тужби против производителите.