Просторниот проблем на ФИНКИ не е нов. Но, по подолго време, изминатиов период беше одново актуализиран кога студентите од најмногубројниот факултет во земјава излегоа на протести барајќи од надлежните соодветен објект во кој ќе може да ја следат наставата
Одговорот што МОН го дава од 2021 година наваму на прашањето за доградба на зградите за ФИНКИ и Факултетот за физичко образование, кои почнаа да се градат во кампусот на УКИМ на Бит-пазар, во извесна мера е контрадикторен. Во 2021 година и сега оттаму велат дека се прави ревизија на проектот. Но во 2022 година од МОН ни кажаа дека проценката и анализата на завршените работи од договорот се готови
Наместо студенти, остатоци од градежни активности и две згради во фаза на карабина. Недостапен простор пред кој сè уште стои информативна табла оти е во процес на изградба. Високи метални огради, дел искршени, низ кои се гледа судбината на местото кое требаше да биде дом на студентите од најмногуброниот факултет при Универзитетот „Свети Кирил и Методиј“ во Скопје.
Ваква е сликата на објектот во кој досега требаше да бидат сместени студентите од Факултетот за информатички науки и информатичко инженерство (ФИНКИ). Иста е состојбата на соседната зграда наменета за студентите од Факултетот за физичко образование, спорт и здравје.
Сместени во непосредна близина на кампусот на факултетите по општествени науки на УКИМ, двете згради кои никако да го видат светлото на денот се во изградба од крајот на 2015 година. Тендерот за нивна изградба, тежок речиси 20 милиони евра, го доби штипски „Бетон“. Активно се градеше до 2019 година, кога во стечај замина изведувачот „Бетон – Штип“. Оттогаш градежните активности на терен, за кои до тој момент се потрошија околу 3,3 милиони евра, се стопирани.
И студентите ги заборавија објектите во градба
Просторниот проблем на ФИНКИ не е нов. Но, по подолго време, изминатиов период беше одново актуализиран кога студентите од најмногубројниот државен факултет во земјава излегоа на два последователни протеста барајќи од надлежните решение и соодветен објект во кој ќе може да ја следат наставата.
Нивниот став е повеќе од јасен, но ги прашавме колкава е за нив неопходноста од нова факултетска зграда и какви се моменталните услови за студирање со кои се соочуваат над 4 000 студенти запишани на ФИНКИ.
„Условите на нашиот факултет е неопходно да се подобрат за самото добро на студентите и професорите. Предавања до доцна навечер и по неколку различни предмети во еден ден се навистина исцрпувачки. Распоредот за полагање во колоквиумска или испитна сесија мора да се прави според слободните простории на другите факултети на техничкиот кампус. Понекогаш се чека и по пет часа за да започне одредено предавање“,
вели студентка од Факултетот за информатички науки.
Слично размислува и друг студент од овој факултет.
„За време на колоквиумска или испитна сесија секогаш се полага некој предмет до 20 часот вечер или, пак, се поклопуваат предмети со термини. Предавањата се одвиваат во бараки без изолација или во подруми кога температурите во летниот период се превисоки. Така што, потребата да имаме зграда е огромна“,
вели студентот што го анкетира „360 степени“.
Додека студентите минатиот месец здружено „бараа зграда од Влада“, министерот за образование и наука Јетон Шаќири во изјава за медиумите во март годинава кажа дека барал средства за доизградба на започнатите објекти на ФИНКИ и Факултетот за физичка култура, но тие не биле одобрени.
„Во претходните два буџета не се обезбедени тие дополнителни средства, но се обезбедени дополнителни средства за ФИНКИ да има повеќе простории во технолошко-техничкиот кампус, кои се приспособени и со буџетот на ФИНКИ и со буџетот на МОН“,
изјави Шаќири на 21 март годинава.
ФИНКИ бара целосно нов објект што ќе ги избегне правните лавиринти
Дека во годинашниот буџет не се одобрени средства за доизградба на објектот на ФИНКИ, како и на зградата на Факултетот за спорт, во одговор на прашања на „360 степени“ посочува и деканот на ФИНКИ, Боро Јакимовски.
„За жал, во буџетот за 2024 година нема издвоено доволно средства за продолжување на нивната изградба, туку се предвидени средства само за подготвителни активности“,
вели Јакимовски.
И покрај постојаната комуникација што раководството на ФИНКИ ја има со Министерството за образование и наука во однос на просторните потреби на Факултетот, како што додава Јакимовски, изградбата на објектите на двата факултета и натаму не е продолжена.
Безнадежност во однос на доизградба на објектот на ФИНКИ во блиска иднина може да се прочита од одговорот што деканот на овој факултет го даде за „360 степени“ на прашањето дали изградбата на веќе отпочнатиот објект ќе ги задоволи нивните просторни потреби. Вниманието сега го насочуваат кон изградба на целосно нов објект.
„Објектот што е започнат со изградба, со цел да ги задоволи потребите на ФИНКИ, треба да претрпи значителни измени. Од тие причини, нашите напори се повеќе кон изградба на нов објект кој нема да биде заглавен во правните лавиринти и ќе обезбеди посоодветен простор за Факултетот“,
вели Јакимовски.
Ревизија долга четири години
Одговорот што МОН го дава од 2021 година наваму на прашањето за зградите на ФИНКИ и на Факултетот за физичко образование хронолошки го има следниот тек.
Во јули 2021 година, откако прекинаа градежните работи на терен бидејќи изведувачот „Бетон“ замина во стечај, од МОН за „360 степени“ кажаа дека во моментот се прави анализа на проектот за да се прецизира предметот на јавната набавка која треба да се распише за доизградба на факултетските згради.
Една година подоцна, во април 2022 година, редакцијата на „360 степени“, во повторен обид да дознае што се случува со зградите на ФИНКИ и Факултетот за физичко образование, доби одговор од Министерството оти анализата е завршена, но дека се размислува за измена на проектот бидејќи предвидената барокна фасада за факултетите е прескапа, а трошоците треба да се рационализираат поради економската и кризата со ковид-19.
Две години подоцна, во април годинава, од електронската адреса на „360 степени“, МОН повторно го доби истото прашање – што се случува со двете факултетски згради лоцирани на општествениот кампус на УКИМ.
Помалку контрадикторно, во одговорот што сега го добивме од МОН повторно е наведено дека се прави ревизија на проектот, иако во 2022 година оттаму кажаа дека проценката и анализата на завршените работи од договорот е направена.
„ФИНКИ ќе добие целосно нов објект во склоп на кампусот на УКИМ. Како што е познато, тој објект започна да се гради, но постапката во моментов е стопирана поради стечај на изведувачот на градежните работи. Информираме дека по ревизија на проектот и проценка на извршените активности од договорот, ќе се избере нов изведувач кој целосно ќе го заврши објектот“,
велат од Министерството во одговорот на „360 степени“.
Факултетот за информатички науки и информатичко инженерство е најмладиот, но и најмногуброен факултет на државниот Универзитетот „Свети Кирил и Методиј“ Скопје, но и на другите универзитети во земјава. Во академската 2022/2023 година, според податоците на Државниот завод за статистика (ДЗС), на ФИНКИ во сите четири години се запишале 4 468 студенти, од кои 1 141 во прва година.
Уште од самото основање на факултетот во 2011 година, студентите на ФИНКИ следат настава во повеќе објекти при технолошко-техничкиот кампус при УКИМ и немаат сопствени простории.