Патниците што пристигнаа во текот на вчерашниот ден од Љубљана и од Меминген се жалеа дека предолго седат затворени во автобусите без вода и храна
Заменик-министерката за внатрешни работи, Славјанка Петровска, соопшти дека е отпочната постапка за вчерашните спроведувања на граѓани во задолжителен карантин.
Таа вели дека внимателно ги следела реакциите на социјалните мрежи од патниците што пристигнаа во текот на вчерашниот ден и се жалеа дека со часови седат затворени во автобусите без вода, храна и без можност да отидат во тоалет.
„Со внимание ги следев реакциите на социјалните мрежи поврзани со начинот на извршување на задачите на полициските службеници ангажирани при обезбедување на превозот на македонските граѓани до објектите кои се одредени за карантин. Ве информирам дека во Министерството за внатрешни работи отпочната е постапка за утврдување на одговорност за начинот на кој полицијата постапила. За да воспоставиме ред, прво мора да го имаме во сопствените редови и затоа нема да толерирам непрофесионално и своеволно однесувањ“,
пишува Петровска.
*Поврзани вести: (ФОТО) Владата се коригира по критиките: Вода и закуска за патниците што доаѓаат од Берлин
Патниците кои пристигнаа од Љубљана седеле седум часа пред хотелот „Макпетрол“ во Маврово без вода и храна, а не можеле да отидат ниту до тоалет додека не се прегледаат сите.
Слично искуство имаа и патниците кои пристигнаа од Меминген и неколку часа седеа затворени во автобус на аеродромската писта во Скопје. Тие се пожалија на истите недостатоци, седење од неколку часа без вода и храна, а не им било ниту соопштено во кој објект ќе бидат во карантин следните 14 дена. Подоцна во ноќта, дел од нив соопштија дека се сместени со хотел „Десарет“ во Охрид.