„Норвешка е наш ценет, посветен и докажан пријател. Областите во кои соработуваме особено во целите на НАТО се бројни. Со ваша поддршка земјава го изгради Регионалниот центар за односи со јавност, кој во моментов е во фаза на интензивен развој во НАТО-школа за односи со јавност, од кој придобивки ќе имаат и двете земји, но и НАТО-сојузниците“, рече министерката за одбрана
Нашата одбранбена соработка е пример за сојузничка соработка и поддршка со која се зајакнува Армијата, но истовремено се зајакнува и мирот, безбедноста и стабилноста на Алијансата. Минуваме низ сеопфатен процес на модернизација. Нашиот одбранбен буџет континуирано расте. Но, секоја дополнителна поддршка од нашите сојузници е добредојдена. Оваа норвешка донација од 76 неборбени моторни возила значително ќе придонесе за зголемување на транспортните можности на единиците на Армијата, односно за нивната борбена готовност.
Ова го рече министерката за одбрана Славјанка Петровска на свечената церемонија за предавање на возилата во касарната „Илинден“ во Скопје, како донација од Кралството Норвешка за Армијата на С Македонија, посочувајќи дека оваа поддршка ќе придонесе за значително зголемување на капацитетите на единиците на нашата армија, како и за постигнување на нивото на борбена готовност на претстојното оценување.
„Норвешка е наш ценет, посветен и докажан пријател. Областите во кои соработуваме особено во целите на НАТО се бројни. Со ваша поддршка земјава го изгради Регионалниот центар за односи со јавност, кој во моментов е во фаза на интензивен развој во НАТО-школа за односи со јавност, од кој придобивки ќе имаат и двете земји, но и НАТО-сојузниците“,
рече таа.
Според неа, Кралството Норвешка е земја партнер во рамките на Балканските медицински сили, чие постојано седиште е во РС Македонија.
Амбасадорката на Кралството Норвешка во С Македонија, Кристин Мелсом рече дека дипломатските врски меѓу двете земји се зајакнуваат последните 30 години, особено по приемот на земјата во НАТО-алијансата во 2020 година.
„Во последните години уште повеќе ја зајакнавме нашата врска со посетата на Командантот на Гардата на Неговото височество и нашиот началник за одбрана Ајрик Кристоверсен, како и со распоредување на македонскиот хируршки тим во Авганистан. Потоа со меѓусебната размена на кадети, посетите на вашите офицери и на нашата бригада Север и на Здружениот оперативен штаб“,
рече таа.
Според неа, ја почитуваат и посветеноста која С Македонија ја покажала кон Алијансата со воената помош што оваа држава ја дала како помош кон Украина, како и зголемениот број војници распоредени во различни мисии.
„Вашата цел да распоредите 10 отсто од вашата армиска структура е импресивна“,
рече норвешката амбасадорка во земјава.
Според Министерството за одбрана, во донацијата од 76-те возила, 36 се лесни пешадиски возила „мерцедес бенз-290ГД“ мулти 2, а 40 се товарни камиони „сканиа-П3“.