Без двоумење предложив армиските припадници да бидат упатени на помош во Словенија, исто како што без двоумење ги испративме војниците и за катастрофалните земјотреси во Турција, рече минситерката за одбрана Славјанка Петровска во гостување во утринската емисија „Здраво Македонијо“ на ТВ Канал 5
Министерката Петровска вели дека фотографиите што се споделуваат во јавноста од припадниците на македонската Армија кои им помагаат на своите словенечки колеги во справувањето со последиците од огромните поплави кои ја зафатија земјата минатата недела, нè прави горди сите нас како Македонци и кажа дека секогаш кога некој ќе има потреба од помош или поддршка, Армијата ќе биде тука да помогне.
„Немаше двоумење од моја страна како министерка да ѝ предложам на Владата, на врховниот командант и на началникот на Генералштабот, дека треба да понудиме наша помош за поплавите во Словенија. Не затоа што сме членка на НАТО, туку затоа што солидарноста и сојузништвото е нешто кое природно ѝ припаѓа на Армијата“,
рече Петровска.
Пред два дена во јавноста беа објавени слики од македонски војници како заедно со словенечката војска градат привремен мост во општината Межица во северниот дел на земјата.
Македонските војници во Словенија учествуваат во хуманитарните операции за санирање на штетите од катастрофалните поплави што ја зафатија оваа земја.
На отворањето на мостот во оваа општина во корушкиот регион, словенечкиот министер за одбрана Марјан Шарец изразувајќи благодарност до инженерите кои придонеле до тоа мостот да се направи, рече дека ова е мост кој е важен за локалното население и за економијата.
Началникот на Генералштабот на словенечката војска, генерал-потполковник Роберт Главаш, на пуштањето во употреба на мостот истакна дека мостот е изграден заедно со војниците на АРМ.
„Словенечката армија од самиот почеток соработува за отстранување на последиците од поплавите. Помага каде што можеме. Мислам дека помошта е огромна. Овој мост го изградивме заедно со членовите на македонската армија за четири или пет дена“,
рече генерал-потполковник Главаш.
Тогаш, министерката за одбрана Славјанка Петровска на својот фејсбук-профил објави дека е горда на македонските војници кои им помогнале на словенечките колеги да изградат мост во Межица, за само неколку денови.
„Северна Македонија стои заедно со пријателската Словенија. Ова е уште еден доказ дека ние сме повеќе од сојузници. Сите сме посилни кога стоиме заедно. Да го продолжиме овој дух на заедништво и помош, секогаш и секаде“,
вели Петровска.
Во Словенија се наоѓаат 100 припадници на АРМ кои помагаат во санирањето на штетите што ги предизвикаа поплавите, како последица на поројните дождови во првата недела од месецов. Помошта беше побарана од страна на Словенија преку механизамот NATO EADRCC.
Припадниците на Армијата на Република Северна Македонија, согласно владината одлука, ќе останат во Словенија 30 дена, каде што се вклучени во хуманитарната операција за санирање на штетите од невремето во поплавените подрачја.