Министерката за одбрана Славјанка Петровска не ја исклучува можноста да се стават на располагање расположливите капацитети на државата за лекување ранети војници од Украина. Повикувајќи се на искуството со тренинзите спроведени на крајот на минатата година, кога околу 120 припадници на украинската армија беа обучувани на тренинг центарот Криволак, Петровска вели дека Северна Македонија има капацитет и Министерството за одбрана би можело да ја поддржи идејата.
„Во рамки на Министерството за одбрана постојат капацитети што би можеле да бидат ставени на располагање. Во оваа иницијатива ќе бидат вклучени повеќе институции, но како МО сме подготвени позитивно да одговориме на таквите барања,“
рече Петровска.
Министерката за одбрана, коментирајќи ја последната изјава на францускиот претседател Емануел Макрон, потсети дека земјава ја поддржува Украина и нејзината борба, но оти нема испраќање војници на украинско почва.
„Тоа воопшто не е дискутирано, на последниот министерски состанок во Брисел воопшто не беше разговарано за испраќање војници. Меѓутоа, поддршка во други форми – да“,
рече министерката.
За идејата да се отвори прифатен центар за рехабилитација на украински војници на Балканот, украинскиот претседател Зеленски разговарал на средба со претседателот Пендаровски.
Од кабинетот на претседателот Пендаровски соопштија дека идејата е прифатлива, но дека деталите би биле во надлежност на владите на земјите кои би учествувале во програмата.
На прашањето дали има пристигнато официјално барање и дали ова прашање е разговарано на седница на Советот за национална безбедност, за тоа какви би биле импликациите по националната безбедност, од кабинетот на претседателот информираа дека станува збор за првичен предлог од страна на премиерот на Хрватска и претседателот на Црна Гора, со оглед на тоа дека тие две држави веќе имаат искуство и капацитети за рехабилитација од воените дејствија во 1990-тите година.