Кон крајот на минатиот месец, по завршувањето на Самитот на европските лидери во Париз, Макрон изјави дека не е постигнат консензус за испраќање војници од европските земји во Украина, но нагласи и дека не треба да се исклучи и оваа можност
Франција може да испрати војници во Украина доколку линијата на фронтот се придвижи кон Одеса или Киев, изјавил францускиот претседател Емануел Макрон, со што потврдува дека не се откажува од идејата да испрати француска армија на боиштата во Украина, пренесува француски „Индипендент“.
Шефот на Франција вчера ги примил шефовите на политичките партии во земјата, а како што пренесуваат тамошните медиуми, целта била да се направи редефинирање на линијата на поддршка за Украина.
Според пишувањата на медиумите, тој не се откажува од идејата за испраќање војници во Украина.
Кон крајот на минатиот месец, по завршувањето на Самитот на европските лидери во Париз, Макрон изјави дека не е постигнат консензус за испраќање војници од европските земји во Украина, но нагласи и дека не треба да се исклучи и оваа можност.
„Во овој момент нема консензус за испраќање војници. Ништо не треба да се исклучи. Ќе направиме сè за да не победи Русија“,
рече тогаш Макрон.
Тој додаде дека Франција ќе се приклучи на чешката иницијатива за купување муниција за Украина.
„Поразот на Русија е неопходен за европската безбедност“,
вели францускиот претседател.
Во врска со руската инвазија на Украина, Макрон рече дека Франција и Чешка се свесни дека војната во Украина се случува на територија на Европа и дека токму поради тоа треба сите заедно да истапат храбро.
Инаку, изјавата на францускиот претседател не беше добро прифатена во Европа, а повеќето европски лидери го отфрлија предлогот, под изговор дека не сакаат да бидат вовлечени во војна со Русија.
Поголемиот дел од европските сојузници на Макрон рекоа дека нема да испратат војници во Украина по неговите коментари дадени на 26 февруари, додека француските власти исто така инсистираа дека таквите воени сили би можеле да бидат испратени за поддршка на операции како деминирање, наместо да бидат вклучени во борба против руските сили.
Чешкиот претседател Петр Павел на безбедносната конференција во Минхен минатиот месец рече дека Чешка, која е членка на ЕУ и НАТО со 10,8 милиони луѓе, би можела да собере значителна количина на оружје за Украина, а додаде дека околу 15 други земји се подготвени да се приклучат на оваа иницијатива.
Макрон рече дека неговата земја ќе учествува во оваа иницијатива, но не откри никакви детали за тоа колку ќе придонесе.
Едно од клучните прашања за Франција беше како би се финансирала таква иницијатива со оглед на тоа што долго време се залагаше ЕУ да го користи европското финансирање само за европската одбранбена индустрија и се спротивстави на идејата за користење европски пари за купување надвор од блокот на членките на ЕУ.