Изминатите денови не убедуваше дека полицијата не треба да казнува туку да биде внимателна. Моите предлози за порешителни акции беа игнорирани, му одговара дополнителната заменик-министерка на министерот за внатрешни работи
Лицемерно и неодговорно е да се криеш од јавни соочувања и да одбиваш покани за ТВ-дуели, а да се обидуваш да се оправдаш преку ФБ – статуси. Македонската јавност и македонската полиција заслужуваат повеќе од ФБ – пост или нарачани интервјуа, реагира дополнителната заменик-министерка за внатрешни работи Славјанка Петровска на статусот на министерот Наќе Чулев, кој ја префрли кај БЈБ одговорноста за постапувањето на полицијата во однос на (не)почитувањето на мерките за заштита од коронавирусот.
Петровска посочува дека директорот на БЈБ испраќал телеграми до началници поставени од Чулев што тие ги криеле во фиока.
„Изминатите денови не убедуваше дека полицијата не треба да казнува туку да биде внимателна. Моите предлози за порешителни акции беа игнорирани. Началниците назначени од тебе саркастично кажуваа дека полицајците немале метро за да измерат два метра растојание!!! И министерот за внатрешни работи ова го оправдуваше“,
напиша Петровска на фејсбук, обраќајќи му се на Чулев.
Исто така, дополнителната заменик-министерка го обвинува Чулев за популизам и за нерешителност.
„Бројката на заболени е резултат на колебливоста и обидите да се биде допадлив во ситуации кога ни треба решителност. Граѓаните нема да не оценуваат по убавите зборови, туку по нашите постапки. МВР и инспекторатите треба да казнуваат за да покажат дека има правда, дека оние што ги почитуваат правилата имаат причина да веруваат во законите. Поткопување на правната држава во време на пандемија е низок популизам на штета на сите нас. И да, не се обидувај со прашината за каблите на АНБ да го сокриеш лошото менаџирање, резултатот се гледа.