Министерот за внатрешни работи, преку статус на фејсбук, објави и дека добивал закани по живот
Порастот на заболени е директна последица на фактот дека власта наместо суштински политики тераше дневен пи-ар од прашањето поврзано со справување со корона вирусот. Секоја одлука на Владата поврзана со мерките, особено кога изборите почнуваа да стануваат актуелни беше носена низ призма на политика, а не за да се заштити здравјето и животот на граѓаните. Тоа е факт од кој нема бегање, коментира министерот за внатрешни работи Наќе Чулев, по забелешките до него во однос на постапувањето на полицијата за спроведување на владините мерки за заштита од коронавирусот.
Во статус на фејсбук, министерот за внатрешни работи ја префрла „топката“ кај Бирото за јавна безбедност при МВР.
„Доколку имаат сомнеж дека полицијата не постапувала соодветно, тоа прашање треба да го упатат до директорот на Бирото за јавна безбедност и од него да побараат одговорност. Јас во неколку наврати усно, преку Координативното тело на МВР, но и писмено, побарав навремено, неселективно, целосно и соодветно спроведување на одлуките на владата. Заштитата на здравјето, не е политика. Тоа е оперативно постапување на полицијата што е во целосна надлежност на директорот за јавна безбедност, факт кој тој во неколку телеграми го потврди и потенцира“,
нагласува Чулев.
Според него, олабавувањето на рестрикциите е резултат на желбата на СДСМ за брзи избори, а обвинувањата кон него, како што оценува, се резултат на тоа што МВР открило криминал во редовите на власта. Министерот за внатрешни работи, исто така, тврди дека добива закани по живот.
Граѓаните се свесни дека зад олабавувањето на мерките за ограничување на движењето се крие само желбата на владејачката партија за што побрзи избори, а здравјето на граѓаните е во втор план. За ова во неколку наврати укажав во јавноста, но и на седниците на владата. Фактот дека Министерството за внатрешни работи секојдневно почна да открива криминал во кој се вмешани функционери на владејачката партија веројатно е причината за нервозата во нивните редови. Меѓу другото, јавноста треба да знае и за секојдневните навреди, но и закани по мојот живот на кои сум изложен, а кои дополнително сведочат за ниското ниво на политичка култура, но и за паниката која е присутна кај нив. Граѓаните треба да знаат дека ниту една политичка изјава нема да ме поколеба во мојата намера да го заштитам здравјето и животот на граѓаните, но и да останам посветен во неселективна борба против корупцијата и криминалот. За мене се најважни граѓаните и нивното мислење и понатаму ќе преземам се што е неопходно за заштита на нивното здравје и здравјето на целата нација. Денешните изјави се само политички и истите преставуваат непринципиелен притисок врз моето работење,“
пишува Чулев на фејсбук.