Техничкиот министер го критикува Спасовски за неговото раководење со МВР пред да биде избран за премиер, обвинувајќи дека во тоа време биле направени десетиците спорни тендери за кои веќе постапува ОЈО
Техничкиот министер за внатрешни работи Наќе Чулев вечерва одговори на денешните прозивки од премиерот Оливер Спасовски за негова одговорност како прв човек на МВР за масовниот верски собир во Струга, наспроти мерките за одржување дистанца, не групирање и носење заштитни маски поради коронавирусот.
Откако Спасовски изјави дека оставка на Чулев би претставувала морален чин и дека треба да има одговорност за случајот во Струга, Чулев напиша на фејсбук дека премиерот треба да побара одговорност од Бирото за јавна безбедност.
„Професионалниот пристап во работата и мојата лична култура не ми дозволуваат да коментирам политички изјави затоа што тие најчесто се одраз на одреден страв, аматеризам, непознавање на состојбите и ниска политичка култура. И навистина е така, особено во денешната изјава на Оливер Спасовски во која тој бара некаква одговорност од моја страна. Па, за да бидат работите целосно јасни, прво ќе го упатам таа професионална одговорност да ја побара од луѓето во БЈБ, кои се поставени токму од него, а кои во хиерархиската поставеноста на МВР имаат директната одговорност на конкретниот настан на кој тој посочува пропусти од страна на полицијата“,
напиша Чулев.
Потоа, техничкиот министер го критикува Спасовски за неговото раководење со МВР пред да биде избран за премиер. Според Чулев, во времето на Спасовски биле направени десетиците спорни и незаконски тендери во МВР, за кои веќе постапува Основното јавно обвинителство.
“Јавноста е сведок дека во времето на Оливер Спасовски на големо се шпекулираше дека полициските структури блиски до него се на платен список кај криминалните структури, а неспорен е и фактот дека токму во тоа време во неколку наврати се случуваше бегство на осудени лица за тешки кривични дела“
пишува Чулев.
Според него, на Спасовски веројатно му пречат констатации на граѓани дека во последните три месеци од страна на полицијатa биле реализирани многу повеќе акции во споредба со целиот негов мандат во МВР. Или, пак, премиерот, според Чулев, е уплашен од неселективно спроведување на законите и безпоштедна борба против криминалот и корупцијата.