Претседателот на ГДУ, Петар Колев, во изјава за БГНЕС вели дека бугарскиот премиер на средбата како приоритет број еден ги навел правата на Бугарите во Северна Македонија, а меѓу клучните прашања ги посочил и промената на учебниците во земјава и искоренување на говорот на омраза. Според изјавата на Колев, Петков имал јасен став дека без резултати по овие прашања, нема да се тргне ветото за старт на преговорите со ЕУ
Премиерот на Бугарија, Кирил Петков, денеска имал средба со организации и здруженија на Бугари во Северна Македонија, која рекол дека нивните права му се приоритет нему и на целата бугарска влада, соопшти прес-службата на кабинетот на бугарскиот премиер.
Дописникот на МИА од Софија, јави дека средбата се одржала на иницијатива на македонските Бугари, а премиерот Петков ја претставил последната информација за текот на преговорите меѓу Бугарија и Северна Македонија, во чиј фокус е вклучувањето на Бугарите во Уставот на Северна Македонија.
Петков ја запознал делегацијата и за неговите разговори со партнерите од Европската Унија во однос на евроинтеграцијата на Западен Балкан.
Претставниците на македонските Бугари изјавиле дека веруваат во новиот пристап инициран од бугарската влада, затоа што се убедени дека проблемите може да се решат единствено со дијалог.
Во дел од бугарските медиуми, пак, се појавија и изјави од претставниците на македонските Бугари. Петар Колев, претседател на партијата Граѓанско демократска унија (ГДУ) за БГНЕС посочил дека бугарскиот премиер јасно кажал дека правата на Бугарите во Северна Македонија се приоритет број еден за него и за владата, како и дека меѓу клучните приоритети на бугарската надворешна политика е промената на учебниците во земјава. Исто така, според изјавата на Колев, бугарскиот премиер истакнал и дека мора да се запре говорот на омраза.
На прашање на БГНЕС дали ветото за почеток на преговорите на Северна Македонија со ЕУ нема да биде тргнато додека не се исполнат овие услови, Колев одговорил:
„Она што го дознавме од разговорот е дека неговиот став е јасен и недвосмислен, дека овие прашања се приоритет и без конкретни резултати за нив не може да се укине ветото“.
Ова беше прва средба на претставници на македонските Бугари со бугарскиот премиер Кирил Петков.