Според бугарскиот претседател, ваквото барање не значи дека тие се мешаат во внатрешните работи на С Македонија
Радев вели дека гарантирањето на правата на Бугарите пред почетокот на преговорите не е мешање во внатрешните работи, туку поддршка патот кон ЕУ на Скопје да се заснова на европски принципи
Бугарскиот претседател Румен Радев побара јасни гаранции од Северна Македонија за почитување на правата на Бугарите во државата. Тој бара пред почетокот на преговорите на земјава со ЕУ да има јасни гаранции за заштита на бугарското културно и историско наследство во С Македонија.
Радев, како што јави дописникот на МИА од Софија, ова го кажал на средбата со претставници на здруженијата на Бугарите од Северна Македонија, при што додал дека Бугарија високо ги вреднува врските со Северна Македонија и со нејзините сонародници во неа.
„Пред да се отвори вратата за преговори, треба да се види јасен и одржлив процес на искоренување на јазикот на омразата. Бугарија сериозно ги сфаќа проблемите на македонските Бугари и високо го цени нивното мислење како побрзо Северна Македонија да го постигне членството во ЕУ“,
рече тој.
Според него, тргањето на страна на политичките проблеми, порано или подоцна, ќе доведе до блокирање на процесот на европска интеграција на Северна Македонија, нешто што според него Бугарија категорично не го сака.
„Јас барам да има јасни гаранции и одржлив процес на европската интеграција на Република Северна Македонија. Бугарија е земјата која сака тоа да се случи најмногу“,
рече Радев и додаде дека впишувањето на македонските Бугари во Уставот на Северна Македонија, освен што ќе доведе до гарантирање на нивните права, треба да биде и задолжителен услов за давање согласност од страна на Бугарија за почеток на преговорите.
Според него, тоа во никој случај не е мешање од страна на Бугарија во внатрешните работи на Северна Македонија, туку повеќе е загриженост и поддршка за одржливиот пат на С Македонија кон членството во ЕУ.