Македонскиот премиер вели и дека министерствата за надворешни работи на С Македонија и на Бугарија се задолжени по однос на отворените политички прашања и тие ќе имаат средба на 10 и на 11 февруари
Бугарскиот премиер Кирил Петков му се јавил синоќа на македонскиот колега Димитар Ковачевски во врска два инцидента што се случија деновиве, а кои беа ставени во политички контекст во однос на релациите Скопје-Софија.
За телефонскиот разговор со Петков, Ковачевски информира претпладнево, по посетата на компанијата „Текстил солушн”. Тој рече дека бугарскиот премиер се интересирал за случајот со отстранувањето на лентите од венците што бугарските делегации ги положија на гробот на Гоце Делчев при чествувањето на 150-годишнината од неговото раѓање.
„Го информирав дека МВР ги прави истражните работи“,
рече Ковачевски.
Петков се интересирал и за случајот во Битола, каде што беше искршено стакло на бугарскиот Културен центар „Иван Михајлов“.
„Во Битола, според соопштението од МВР, излезе дека не се работи за политички инцидент, туку за инцидент мотивиран од други – приватни причини, за што лицето што го сторило тоа веќе има дадено изјава“,
рече Ковачевски.
Тој посочи и дека министерствата за надворешни работи на С Македонија и на Бугарија се задолжени по однос на отворените политички прашања и тие ќе имаат средба на 10 и на 11 февруари.
„Тие ќе работат и разговараат за отворените прашања и доколку се постигне напредок за двете страни, врз основа на европски вредности и меѓусебно почитување, тогаш МНР ќе соопшти, на ист начин како што министерот за надворешни работи имаше обраќање во Комисијата за надворешни работи во Собранието“,
рече Ковачевски