Фрчкоски само еднаш е осуден, мислам 2008 година, за клевета на тогашниот премиер Никола Груевски, за објавен текст-колумна во тогашен „Дневник“ и јас не мислам дека тоа го прави недостоен, рече претседателот Пендаровски
Професорот Љубомир Фрчкоски, кој неодамна со указ на претседателот Стево Пендаровски, е назначен за амбасадор на земјава во ООН во Њујорк, не е осуден за никакво кривично дело.
Ова го истакна шефот на државата во вечерашното интервју во емисијата „Топ тема“ на телевизија Телма, посочувајќи дека во казнената евиденција на МВР има „едно шест-седум пријави минимум“ за Фрчкоски за тендери, коњи, „рејбани“, меѓутоа ниту една од нив не дојдена до обвинителен акт, а не па до пресуда.
„Фрчкоски само еднаш е осуден, мислам 2008 година, за клевета на тогашниот премиер Никола Груевски, за објавен текст-колумна во тогашен ’Дневник‘. Јас не мислам дека тоа што е осуден го прави недостоен, бидејќи знаеме кој беше Никола Груевски и како владееше и го знаеме текстот на колумната. За обвинувањата од пријавен карактер има полициски записник, има пријава во полициска станица, земена е изјава од тогашната сопруга, земена е изјава од Фрчкоски и полицијата ги упатува да го решат спорот на суд. Во казнената евиденција на судот кој го консултираа од МНР и од мојот кабинет, нема кривична пријава по тој повод“,
рече Пендаровски.
Претседателот зборуваше и за меѓународната пракса и целата процедура за именување на амбасадори надвор од државата, односно предлозите на Владата.
„Според меѓународната пракса околу 90 дена се чека согласност од државата каде што сакате да го праќате. По 90 дена, многу ретко доаѓа негативен одговор, обично Ви текнува дека не е тој човек за кандидат. Во март Владата ми го предлага Фрчковски за амбасадор. Неполн месец дена после тоа, не после два-три-пет дена, па да речат овие не го сакаат, добивам нов предлог од тогашната Влада за Њујорк“,
рече Пендаровски, посочувајќи дека во законот постојат неколку услови кој ве оневозможуваат да бидете на амбасадорска позиција, како што е двојното државјанство, ако сте осуден за некое дело на подолго од шест месеци и ако сте осуден за кривично дело кое ве прави недостоен за таа работа – функција.