Членството на Северна Македонија во ЕУ не е потребно само за зајакнување на економијата, унапредување на трговската размена и подобрување на животниот стандард, туку е потребна и политичка интеграција во институциите на ЕУ, како и демократски развој, зајакнување на институциите, владеење на правото и слободни медиуми, вели претседателот
Европската политичка заедница треба да биде инструмент што ќе ни помогне во процесот на пристапување кон ЕУ, а не само дебатен клуб или пак замена за членството во Унијата, затоа што веќе се соочуваме со трендови на зголемување на евроскептицизмот и над 20 отсто пад на поддршката за пристапувањето кон ЕУ, изјави претседателот Стево Пенадровски на панел кој се одржа за време на 5. издание на Парискиот мировен форум.
Тој дополни дека членството на Северна Македонија во ЕУ не е потребно само за зајакнување на економијата, унапредување на трговската размена и подобрување на животниот стандард, туку дека е потребна и политичка интеграција во институциите на ЕУ, како и демократски развој, зајакнување на институциите, владеење на правото и слободни медиуми.
Претседателот Пендаровски, се наведува во соопштението испратено од неговиот кабинет, исто така, истакна дека во изминатите месеци е разбирливо што сите зборуваме за безбедносната состојба во Украина поради руската агресија таму, но дека темата за безбедност е доста позната за Западниот Балкан со оглед на неговата модерна историја.
Кога се зборува за решенија на кризите, претседателот рече дека решение за системската криза која сѐ уште тлее во регионот на Западен Балкан е да имаме поголемо европско присуство во регионот.
„Некогаш работите изгледаат како да сме заборавени од Унијата и без напредок на земјите кон Унијата“,
додаде тој.
Претседателот посочи дека Северна Македонија го отпочна процесот на пристапување кон Унијата и дека е во тек скрининг процесот што треба да трае до крајот на идната година, а потоа, нагласи, дека можеме да зборуваме за следните фази од процесот на пристапување кон ЕУ.
Претседателот, се додава во соопштението, се осврна на нашиот регион за кој рече дека има споделени предизвици, дека демографските трендови не се поволни и притоа порача дека е потребно да се инвестира повеќе за младите луѓе, со цел да имаат повеќе можности за успех дома во своите земји. Тој додаде дека ни е потребно поголемо европско присуство постојано, а не само кога има кризни случувања.
Одговарајќи на прашањето за можностите за евроинтеграција на Украина, претседателот истакна дека земјава дава поддршка за членство на Украина во ЕУ и дека тој својата поддршка ја покажа и со писмо упатено до претседателот Зеленски. Претседателот истакна дека и покрај состојбата во која се наоѓа Украина, добивањето на кандидатски статус е силна политичка порака од Унијата, стратешки поглед на ЕУ, солидарност и подготвеност да се демонстрира заедништвото на Унијата со украинскиот народ.
Претседателот Пендаровски учествува на 5. издание на Парискиот мировен форум во рамки на кој имаше повеќе средби со шефови на држави, учесници на форумот.