Државниот пазарен инспекторат досега затворил најмалку 17 објекти кои не ги почитувале владините мерки за заштита од коронавирусот.
Како што соопшти директорот на Инспекторатот, Стојко Пауновски, три објекти се затворени на 13 и 14 март, вчера се затворени седум, а денеска, досега се затворени уште најмалку седум.
„Од денеска затвораме објекти каде што има нарушување и непочитување на владините одлуки. Инспекторите се постојано на терен, и дење и навечер, до 00:00 часот. Но, имаме и дополнителни екипи кои вршат контроли ноќе со оглед на дојавите од граѓани дека некои објекти и тогаш работат“,
рече Пауновски на прес-конференција во Владата на која присуствуваа директорите на пет инспекторати.
Според Пауновски, секогаш има луѓе кои не го почитуваат пропишаното, па казните за нив ќе бидат согласно одлуката на Владата.
Државниот пазарен инспекторат досега направил контроли во 80 маркети и аптеки и не утврдил покачување на цените. Спровел и 3 000 надзори. Притоа констатирал дека најголем дел од објектите ги почитуваат мерките.
Ако некој има сознанија за објект што работи спротивно на владините препораки, може да пријави на телефонскиот број 02/3220547.
*Поврзана вест