МВР отвори посебна линија и имејл за информирање и пријавување на непочитување на мерките што ги воведе Владата за заштита од ширење на коронавирусот.
Телефонската линија 0800 00201 ќе работи 24/7 и е на два јазика. Исто така, пријавите можат да бидат на електронската адреса mvrinformaciiuslugi@moi.gov.mk.
Министерот за внатрешни работи Наќе Чулев на денешната прес-конфереција информира дека полицијата ќе ги засили контролите за оние што се во задолжителна самоизолација.
Според податоците што тој ги соопшти, во Скопје под полициска контрола на мерките здравствен надзор и самоизолација се 173 лица, во Битола 13, во Тетово 16, Охрид 82, Куманово 6, Штип 8 и Струмица 12 лица. За три лица од Тетово и Струмица кои ги прекршиле мерките се поднесени соодветни пријави до тамошните обвинителства. За Скопје се работи на 4 такви случаи.
Пријавите се по членовите 205 и 206 од КЗ, за пренесување заразна болест и непостапување по здравствените прописи за време на епидемија.
Чулев информира и дека постојано се вршат контроли на угостителските објекти, при што најмногу затворени поради непочитување на мерките се затворени во Скопје – 7.
Чулев апелираше до граѓаните да не патуваат во овој период додека траат мерките и потсети дека утре се затвора аеродромот во Скопје, а граничните премини се веќе затворени за сите странски државјани и патници и возила. На неакредитираните дипломатски претставници кои транзитираат им се дава период од три часа да ја напуштат државата.
Чулев информира дека до 7 часот утрово во земјава влегле 2 019 лица, а 1 331 излегле од државата.
Полицијата во соработка со МНР асистира за прифаќање на околу 200 наши државјани кои денеска треба да пристигнат во земјава, а беа заглавени на српско-хрватската и српско-унгарската граница.
Исто така, од Србија која била задолжена за извлекување на државјаните од регионот заглавени на крузери, во земјава се пристигнати шестмина. Од нив двајца се државјани на Албанија кои се на пат кон својата земја, а четворица наши државјани се наоѓаат на Инфективната клиника. Еден наш државјанин е задржан во Белград.