Пациентката на која вчера ѝ беше извршена трансплантација на срце вчера имала мали крвавења, но денеска ситуацијата и е стабилна, вели министерот Венко Филипче, кој верува дека ќе остане така и во текот на денот.
Сè уште е рано, вели тој, но знаците се добри.
„Пациентката е стабилна, вчера имаше неколку ревизии, неколку мали крвавења, после што се најдоа некои технички извори на крвавења кои се решија и денеска е дефинитивно стабилна, ги нема тие значи што ги имаше вчера. Јас верувам дека тоа значи и дефинитивно стабилизирање на состојбата, дека нема да се случи некаква друга хируршка компликација. Ова е информации од утрово, верувам дека во таа насока ќе продолжи и во текот на денешниот ден. Сега е ситуација кога секој час, секоја минута е битна. Се следат параметрите на секој час и во делот на анализа на крвната слика, и во делото на дишењето и работата на срцето. Сè уште е рано, меѓутоа знаците се добри“,
изјави Филипче.
Станува збор за 39-годишна жена, која доби ново срце од 40-годишна жена која почина, а чие семејство одлучило да ги донира органите. Покрај срцето, таа спаси уште два други животи со донација на бубрезите.
Вчерашната беше трета трансплантација на срце во земјава. Првата се случи лани во мај кога срцето на починатата Емилија Динева продолжи да чука во 53-годишниот Иван Огненовски, кој долго време чекаше дарител.
Во април годинава, пак, се направи втората трансплантација. Дарител беше младата Верица Белчовска, која загина во сообраќајна несреќа. Исто така, беше направена трансплантација и на бубрезите, но и на коските.