Синоќешното разрешување на техничката министерка за труд и социјала Рашела Мизрахи и денеска е тема за партиски препукувања меѓу власта и опозицијата. Пред почетокот на денешната собраниска седница, СДСМ и ВМРО-ДПМНЕ излегоа со прес-конференции во парламентот, посветени на разрешувањето на Мизрахи, која е тргната од функцијата поради нејзините настапи во јавност на кои неколкупати застана зад старото државно име „Република Македонија“
За опозициската ВМРО-ДПМНЕ Мизрахи е политичка жртва, која власта ја разрешила за да не го открие, како што велат, криминалното работење на нејзината претходничка Мила Царовска.
“Јавноста само треба да ги погледне прес конференциите на Рашела Мизрахи, за да види какви дубиози се случувале во Министерството за труд и социјала во време на Царовска и ќе им стане јасно зошто се бараше разрешување по итна постапка среде ноќ“
– порача од прес-салата во собранието пратеничката на ВМРО-ДПМНЕ Благица Ласовска.
Од СДСМ пак, порачаа дека разрешувањето на министерката Мизрахи е во насока на заштита на Уставот.
“Владеењето на правото и правната држава подразбира одговорност и одговорност мора да има. Сите членови на Владата мора да ги почитуваат Уставот и законите и мора да работат во интерес на граѓаните и државата. Заштитени се и интересите на стечајните работници, истите оние за кои таа даде негативно мислење и заедно со Владимир Ѓорчев не дозволуваше да се прошири опфатот на стечајци кои добиваат месечен надомест“
– порача на прес-конференција пратеничката од СДСМ, Јагода Шахпаска.
Со слична реторика пратениците продолжија и на седницата на која се расправа за Законот за Советот на јавни обвинители.