Владејачката партија во Германија веќе го откажа вонредниот конгрес планиран за април
Владејачката Христијанско демократска унија (ЦДУ) во Германија веројатно ќе ги одложи внатрепартиските избори поради епидемијата на коронавирус, соопшти денеска претседателката на партијата Анагрет Крамп-Каренбауер.
Партијата веќе го откажа вонредниот конгрес планиран за април, а германската ДПА го пренесе предвидувањето на Крамп-Каренбауер дека одлуката за нов претседател на партијата најверојатно нема да се донесе пред редовниот конгрес во декември.
Новиот претседател на партијата ќе има можност да се кандидира за канцелар на следните сојузни избори откако Ангела Меркел се откажа од борбата за петти мандат на чело на владата во Германија.
Главни кандидати за нов челник на партијата се поранешниот ривал на Меркел – Фридрих Мерц, кој е популарен меѓу десничарите и Армин Лашет, премиер на Северна Рајна Вестфалија.