Судијката од Кривичниот суд во Скопје, чиј глас се слушна и во „бомбите“, се приклучи кон групата судии, главно од овој и од Врховниот суд, кои се разрешени во изминатиот период
Судскиот совет денеска донел одлука за разрешување на уште една судијка.
Станува збор за Софија Лаличиќ од Основниот кривичен суд во Скопје, за чие разрешување, како што јавија денеска дел од медиумите, одлуката била донесена со 11 гласа „за“ и два „против“.
„Донесена е Одлука со која еден судија се разрешува од вршење на судиската функција, поради нестручно и несовесно вршење на судиската функција.Истовремено донесена е Одлука со која времено се оддалечува од вршење на судиската функција до правосилно завршување на постапката“,
се наведува во известувањето на Судскиот совет за денешната седница.
Лаличиќ се спомнуваше во една од „бомбите“ што ги објавуваше СДСМ од нелегалното масовно прислушување. Поточно, тогаш опозицискиот СДСМ објави снимка од нејзин разговор со некогашниот директор на УБК, Сашо Мијалков, на прес-конференција посветена на состојбите во судството. Во овој разговор се спомнуваше и поранешната претседателка на Основниот суд Скопје 1, Лидија Неделкова, која неодамна, исто така, беше разрешена од врховна судијка.
Претставката за утврдување одговорност на Неделкова ја поднесе поранешниот претседател на Врховниот суд, Јово Вангеловски, кој во меѓувреме, исто така, беше разрешен од судија.
Во меѓувреме, поради злоупотреби на АКМИС, беше разрешена и Татјана Михајловска, едно време претседателка на скопска „единица“.
За злоупотреби на АКМИС се води и кривична постапка против поранешниот претседател на скопскиот Кривичен суд, Владимир Панчевски.