На онлајн-состанок на премиерот и министрите за финансии и економија со претставници на СБ е истакната важноста домашните компании да ја подобрат конкурентноста и продуктивноста за постигнување посилен економски раст
Владините мерки за поддршка на реалниот сектор, како и заложбите за помош на најранливите категории во услови на здравствено-економска криза, со фокус на идните заложби за стимулирање на националната економија на долг рок, беа тема на онлајн-состанокот на премиерот Зоран Заев, министрите за финансии Фатмир Бесими и за економија Крешник Бектеши со Масимилијано Паолучи, директор на Светска банка за Северна Македонија и Косово и Кун Давидсe, извршен директор во Одборот на директори на Групацијата Светска банка во Вашингтон.
На состанокот, како што соопштија од владината прес-служба, во фокусот била дискусијата за важноста на анализата заснована врз реални истражувања за информирање на одлуките за политиките кон кои треба да се насочат владините активности со крајна цел продолжување и одржување на правичен и одржлив раст.
Премиерот Заев ја истакнал посветеноста на Владата за справување со предизвиците на краток, како и обезбедување услови за побрзо економско закрепнување на среден и долг рок, притоа потенцирајќи на важноста од соработка со Светска банка како стратешки партнер, кој обезбедува голема поддршка за државата.
Од страна на Светската банка е нотирано дека владините мерки ги ублажија негативните ефекти од кризата и е нагласено дека заедничката соработка во однос на предлог-мерките согласно светските искуства и преземената акција особено во делот на субвенционирање на платите резултираа со зачувување на работните места во микро, малите и средните претпријатија. Дополнително, мерките донесени од Владата го олеснија влијанието врз сиромашните, што е и потврдено со пониски стапки на раст на сиромаштијата од очекуваните.
Во разговорите е истакната важноста домашните компании да ја подобрат конкурентноста и продуктивноста за постигнување посилен економски раст во иднина. Во таа насока, поддршката за компаниите треба да биде насочена кон дигитализацијата, технолошки развој, подобрување на капацитетите за управување, поддршка на диверзификација на извозот, како и спроведувањето на европскиот зелен договор.
Дополнително, регионалниот развој е од голема важност за економски напредок, како и зајакнување на женското претприемништво. На состанокот е разговарано за важноста на одржливи инвестиции во образованието и човечкиот капитал, поттикнување на иновативноста за отворање нови работни места и инвестиции. Истакнато е и дека за натамошен развој и унапредување на деловниот амбиент од особена важност е привлекувањето и задржување инвестиции со поголема додадена вредност, подобрување на пристапот до финансии, како и намалување на конкуренција од неформален сектор и сузбивање на корупцијата.