Владата ќе биде посебно фокусирана на тоа да се намалат дискрециските овластувања на функционерите, кои се распространети во стотици закони. Веднаш ќе почнеме со анализа на сите прописи што предвидуваат дискрециски овластувања, во што интензивно ќе соработуваме со МИОА, експертите, НВО…, вели за „360 степени“ вицепремиерот Николовски
Кратење на дискрециските овластувања на директорите и на министрите најавува новиот вицепремиер за борба против корупција и за одржлив развој и човечки ресурси, покрај најавата за кратење на функционерските бенефиции. За таа цел ќе се прави анализа на стотици закони, по што ќе се носат и одлуки за тоа кои овластувања ќе се ревидираат и ќе се намалат, што ќе значи и промена на одредени прописи.
Во изјава за „360 степени“, Николовски вели дека приоритетно прашање во однос на платформата што ја најави Владата за спречување корупција, особено меѓу функционерите, е намалување на дискрециските овластувања.
„Владата ќе биде посебно фокусирана на тоа да се намалат дискрециските овластувања на функционерите. Решени сме да бидеме истрајни во обидот да реагираме на сите сомнежи околу злоупотреба на позиција или моќ. Во делот на дискрециските права, кои се распространети во стотици закони, веднаш ќе почнеме со анализа на сите прописи што предвидуваат дискрециски овластувања, во што ќе ќе соработуваме интензивно со Министерството за информатичко општество и администрација, експертите, невладиниот сектор и други чинители“,
ни изјави Николовски.
Тој објаснува дека, по завршувањето на анализите, ќе следува одлука за тоа кои овластувања ќе се ревидираат и ќе се намалат.
„Тоа не значи дека дискрециските овластувања ќе ги снема апсолутно, тие постојат во секоја земја, но онаму каде што ќе се утврди дека се непотребни, секако ќе се намалат. Важно е дека имаме силна политичка волја и нема да дозволиме никој да биде над законот, а токму носителите на функции со свој пример мора да го докажуваат тоа“,
вели Николовски.
Поранешниот премиер од СДСМ, Владо Бучковски, вели дека во Владата веќе има обемна анализа за дискрециските овластувања на избраните и именувани функционери.
„Широк е спектарот на посебни овластувања, уредени со стотици закони, што ги имаат одредени функционери во сите државни институции. Многу од тие овластувања се потенцијални точки за корупција од висок профил. Затоа, Владата до 2006 година ангажираше цел експертски тим од правниот факултет за да направи анализа и да лоцира кои се најризичните точки за корупција, во однос на функционерските овластувања. Таа анализа би можела да и послужи и на сегашната влада“,
ни изјави Бучковски.
Професорите од Правниот факултет на УКИМ, Ана Павловска-Данева, Борче Давитковски и Никоа Тупанчевски биле во експертскиот тим што ги анализирал дискрециските овластувања на функционерите, со цел нивно редуцирање. Како претставник од Владата, тимот го координирал тогашниот вицепремиер Јован Манасијевски. Сепак, анализата на професорите во тоа време не стигна до конкретни одлуки за кратење на одредени функционерски овластувања.
СДСМ деновиве најавува нови механизми за превенирање незаконско богатење на државните функционери за време на мандатот, како една од обврските што ги презема новата влада на Зоран Заев.
Кратење на функционерските бенефиции, ревидирање на Кодексот за функционерите во извршната власт, следење на патот на парите на избраните и именувани функционери, засилена координација меѓу институциите за борба против корупцијата, ветинг во правосудството… се дел антикорупциските мерки што ги најавува владејачката партија.
Заев реши да го почне новиот мандат со помал број министри во втората влада. Тој ја укина позицијата министер без ресор, така што овој негов кабинет има седум министри помалку, во споредба со владата што беше избрана во 2017 година. Затоа, пак, е воведена нова вицепремиерска позиција – за борба против корупцијата, одржлив развој и човечки ресурси.