Кратење на функционерските бенефиции, ревидирање на Кодексот за функционерите во извршната власт, следење на патот на парите на избраните и именувани функционери, засилена координација меѓу институциите за борба против корупцијата, ветинг во правосудството… се дел антикорупциските мерки што ги најавува владејачката партија
Нови алатки за превенирање незаконско богатење на државните функционери за време на мандатот, најавува СДСМ, како една од обврските што ги презема новата влада на Зоран Заев.
Тој во своето експозе во парламентот најави „ред, правда, дисциплина и силни, ефикасни и професионални институции“, засилувајќи ја реториката во тој правец во споредба со 2017 година, кога ветуваше „силни, професионални институции и правда за сите“.
Од владејачката партија, во новиот мандат на „Илинденска“ најавуваат воведување „системска алатка и концепт“ за следење на парите и капиталот на функционерите, со цел да се спречи незаконско зголемување на нивниот имот за време на вршење на јавната должност.
„Се работи на ревидирање на Кодексот за етичко однесување на членовите на Владата и функционерите именувани од Владата, а главната максима во неговата имплементација е нулта толеранција за корупција, нулта толеранција за министрите, директорите, раководителите и за целата јавна администрација. Секој што ќе го прекрши законот, ќе мора да сноси одговорност“,
велат од СДСМ.
Се најавува засилена соработка и координација меѓу сите надлежни институции, како МВР, Управата за финансиска полиција, Управата за финансиско разузнавање, Царинската управа, УЈП, инспекторатите, со цел, како што се наведува во партиското соопштение, премостување на сите пречки во нивната меѓусебната комуникација.
„Во новата програма на Владата се поставени јасни столбови во борбата против корупција, преку воспоставување прецизни и соодветни механизми за интензивна соработка меѓу сите надлежни чинители. Транспарентноста и отвореноста се врвен приоритет, а тие ќе бидат спроведени од највисоко до најниско ниво“,
се наведува во партиското соопштение.
Заев реши да го почне новиот мандат со помал број министри во неговата втора влада. Тој ја укина позицијата министер без ресор, така што овој негов кабинет има седум министри помалку, во споредба со владата што беше избрана во 2017 година. Затоа, пак, е воведена нова вицепремиерска позиција – за борба против корупцијата, одржлив развој и човечки ресурси.
Љупчо Николовски, новиот вицепремиер, кој е задолжен за координирање на институциите што се борат против корупцијата, најави кратење на функционерските бенефиции.
„Секој од нас е дојден овде да работи за плата и да сработи најдобро што може за граѓаните. Како што јас сум можел да не користам службена картичка како дополнителен заменик-министер и како министер и ништо да не ми фали, можеме со секој еден функционер од централно и од локално ниво да го менуваме сето она што ни следува. Може да се скратат многу трошоци, бенефиции и привилегии, но ќе притиснеме да имаме целосна транспарентност и отворени податоци и на локално ниво“,
заклучи Николовски.
Новиот министер за правда Бојан Маричиќ, пак, најави дека Владата уште во првите сто дена ќе го дефинира моделот за т.н. ветинг на правосудството.
Идејата, како што појасни Маричиќ, е да има концепт во кој ќе има проверка на имотот на судиите и на обвинителите, на случаите кои се застарени или блиску до застарување, проверка на случаите на висока корупција или висок јавен интерес. Ќе има и ефективна постапка за оние судии и обвинители кај кои ќе се утврди одговорност за непостапување и непрофесионално настапување.