Предметите на СЈО мора да добијат разрешница, а воспоставуваме и систем за проверка на имот на сите функциониери, рече мандатарот во експозето на денешната седница
Заев очекува до крајот на мандатот на неговата втора Влада да бидат отворени 80 проценти од поглавјата во преговорите со ЕУ
Со изборот на оваа Влада го комплетираме системот што ќе работи за справување со последиците од корона -кризата, поради која државата и целиот свет се наоѓа во ситуација што се заканува на сите сегменти на живеење, рече мандатарот Зоран Заев во своето експозе пред пратениците, на денешната седница за избор на владата.
Ова е мала, но компактна Влада, посочи Заев,во која членуваат мотивирани и посветени личности, кои ќе работат на остварување на поставените цели во стратешки интерес на државата.
„Се обврзувам дека како премиер со сите министри ќе покажеме уште еднаш и пред себе и пред светот дека можеме уште повеќе и подобро. На овие избори имавме историска можност со Беса да ја формираме коалицијата ‘Можеме’. Денеска таа програма, усогласена и дополнета со нашите коалициски партнери, ДУИ и ДПА, е преточена во Програма за работата на владата 2021 – 2024 година, која предвидува нова енергија во остварување економски раст, модерно образование и справување со пандемијата“,
рече Заев.
Економски раст од четири проценти
Покажавме, посочи тој, што значи да се спасуваат работни места и да се одржува стабилна економија и во време на пандемија.
„Се обврзуваме во време на криза минималната плата да ја задржиме на 14.500 денари и да ги помагаме граѓаниете и компаниите. По завршување на кризат,а Владата ќе се обврзе на 20 до 30 отсто раст на минималната и просечна плата. Наша цел е 20 илјади денари минимална плата до крај на мандатот. Во зависност од траењето на светската криза, се обрзуваме да оствариме раст од 4 отсто .
изјави Заев
Тој најави и дека износот на нето-инвестициите ќе биде една милијарда евра, нивото на јавни инвестиции ќе порасне на две милијарди, а стрнаските директин инвестиции на над една и пол милијарди. Домашните и странските инвестиции ќе ги поддржиме со 300 милиони евра од буџетот и 300 милиони од странските фондови, рече Заев.
Систем за проверка на имот на сите функциониери
Следува, посочи тој, реформа на јавната администрација, со цел да даде максимум ефикасни услуги на граѓаните.
„Ќе разгледаме неколку модели за реформи на администрацијата и намалување за 20 проценти, со реорганизација, пензионирање и трансфер во приватниот сектор“,
истакна мандатарот.
Најави и дека следува целосно прочистување на судството и градење правна држава.
„Судиите за кои ќе се докаже дека свесно и намерно застарувале предмети ќе бидат разрешени. Предметите на СЈО ќе мора да добијат разрешница. Воспоставуваме систем за проверка на имот на сите функциониери. Силната заложба во борбата против корупцијата е и новиот министер за борба против корупцијата, изјави Заев.
Откако влеговме во НАТО, нагласи Заев, ќе покажеме дека можеме и во ЕУ.
„Новата Влада е посветена на договорите од Преспа и со Бугарија, кои го овозможија тоа. Ќе продолжиме посветено да работиме на добрососедските односи. Ќе продолжиме и со Охридскиот рамковен договор, кој е основа на меѓуетничкиот соживот. Пред нас е период во кој како држава ќе добиме многу повеќе отколку што ќе дадеме. Се обврзуваме во следните четири години да отвориме 80 проценти од преговарачките поглавја“,
изјави Заев.
Продолжуваат инвестициите во здравството
Принципите и вредностите, посочи тој, на кои се заснова оваа програма се европските вредности.
„Целта на Владата е да ја развива култирата во сите сегменти и да ги зајакне институциите. Истовремено, предвидуваме мерки со кои културата ќе придонесе во развојот на економијата и новите бизниси“, .
изјави Заев
Нагласи дека во следните месеци, веројатно, ќе се влоши ситуацијата со ковид-19.
„Нашата земја ќе стори се и веќе сме подготвени со нови пакети и мерки за поддршка на сите граѓани. Сметајте на вашата земја и институции, но и почитувајте ги мерките за лична заштита и на своите најблиски“,
посочи мандатарот.
Затоа, како што нагласи, продолжуваат инвестициите во здравството и изградба на нов здравствен центар.
„ Се обврзуваме на силна и бескомпромисна борба за чист воздух и животна средина. Ќе вложуваме во обновливи извори на енергија. Ќе ги зајакнеме инспекциските служби и ќе ги зголемиме казните. Најважно од се, ќе спроведеме акции во кои секој ќе треба да се вклучи“,
рече Заев, нагласувајќи дека со овие принцип се усогласени сите политички субјекти кои се дел од новата новата коалиција на власт.