Предлог-програмата што мандатарот Зоран Заев ја достави денеска во парламентот е напишана на над 50 страници, а на прво место е ставена точката посветена на економски развој
На шест главни теми се базира предлог- програмата за работа на идната влада, во периодот 2020 – 2024 година, што мандатарот Зоран Заев денес ја достави во парламентот, заедно со списокот на имиа за состав на неговиот нов кабинет.
Во неговата програма, напишана на над 50 страници, на прво место е ставена економијата, а мерките што планира да ги преземе новата влада се посочени во точката насловена:
Трансформација на економијата (МК рестарт) за забрзан раст и повисок стандард
„До крајот на мандатот ќе ја вратиме нашата економија на солиден и оддржлив раст од 4%. За време на кризата се обврзуваме да ја задржиме висината на минималната плата во висина од 14.500 денари. По завршувањето на кризата, Владата ќе продолжи со своите докажани заложби: 1) раст на минимална плата до крајот на мандатот во висина од 20 до 40% и 2) раст на просечната плата до крајот на мандатот од 20 до 30%, во зависност од должината и влијанието на епидемијата врз светската и домашната економија“,
се наведува во овој дел од програмата, посветен на финансиските и даночни политики, туризмот, земјоделието, инфраструктурата…
Износот на странските инвестиции во програмата е планиран на ниво од најмалку една милијарда евра за 4 години
„Трансформацијата на економијата ќе биде следена со серија добро осмислени, практични и оставрливи мерки за поддршка, кои реално ќе помогнат нашиот бизнис да биде растечки, развоен и одржлив. Како и досега, клучната поддршка ќе биде токму на движечката сила на нашата економија, на најголемиот сектор за вработување, создавач на вредноста и најсилниот потрошувач, а тоа се микро и малите компании. Продолжуваме со Планот за економски раст и мерките предвидени во политиката, со зголемување на фондот за најмалку 20% на годишно ниво“,
се наведува на програмата.
Следната точка е посветена на планираните мерки за надминување на последиците од кризата со коронавирусот:
Заедно ќе го победиме ковид-19
Навремените рестриктивни мерки, како што се наведува. ја спасија државата од стравичните слики од болниците во Кина, Италија, Шпанија… Владата, се посочува: ќе продолжи да го штити здравјето кое е на прво место, но и економијата:
- Да ги заштитиме најзагрозените преку силни и брзи социјални мерки обезбедени за повеќе граѓани и семејства;
- Да им помогнеме на претпријатијата во најтешкиот период со достапни финансиски средства преку директна поддршка, гаранции и поволни кредити;
- Да се олесни најсилниот удар на кризата и кај фирмите и кај домаќинствата преку репрограмирање и одлагање на исплата на кредити;
- Да ја зајакнеме приватната потрошувачка со мерки насочени кон позагрозени семејства, невработени, млади и студенти.
„Во новиот мандат ќе го прошириме опфатот на подршката на приватната потрошувачка со уште две категории граѓани: невработени лица кои не се пријавувале секој месец во Агенцијата за вработување, пензионерите со месечни примања под 15000 денари, стечајците и самохраните родители“, стои во предлог-програмата на Заев.
Следната точка во програмата за работа на новата влада на СДСМ и ДУИ се однесува на социјалната политика, образованието, спортот и рекреацијата и е насловена:
Грижа за сите
„Во битката против сиромаштијата имаме многу конкретна задача: да ја намалиме стапката на сиромаштијата под 16%, со посебен акцент на детската сиромаштија. Втората половина од патот на социјалната реформа е да покажеме дека локалните заедници ќе им овозможат на граѓаните квалитетни социјални услуги, кои ќе бидат креирани со граѓаните и согласно нивните потреби. Концептот ‘општината се грижи’ ќе создаде нови услуги, но истовремено ќе обезбеди нови работни места во овој сектор, отворање на канцеларии на центрите за социјална работа во секоја општина на територијата на државата и секој центар за социјална работа ќе формира интервентен тим што ќе постапува 24/7, по примерот на Скопје. Владата ќе промовира политики базирани на аргументи и емпатија кои ќе ги рушат бариерите и за лицата со попреченост и нивните семејства“,
се наведува во делот од програмата посветен на социјалната политика на идниот кабинет на „Илинденска“ бр.2.
Псебен акцент е ставен, исто така, и на политиките за реформа на правосудството и за борба против корупцијата. Таа точка е насловена:
Ред и правда
„Владата има целосен консензус дека е неопходно ефикасно и објективно ‘прочистување’ во правосудството. Првиот чекор за ветинг е веќе направен со надлежноста на ДКСК да ја испитува имотната состојба на судиите и јавните обвинители. Судскиот совет од своја страна, согласно новите закони, најави детална проверка на работата на судиите, особено во врска со одредени постапувања по предмети кои беа доведени до застареност со одлагање, ретки рочишта и слично. Проверка може да го опфати личното и професионално минато, стручноста и отпорноста на влијание на интересните групи“,
се наведува меѓу другото во овој дел од приграмата.
Владата, како што е предвидено, ќе се посвети на обезбедување ЕУ мониторинг на судските предмети на висока корупција. Владата ќе предложи и законска обврска за објавување и јавен пристап до аудио снимките од сите судења за висока корупција и организиран криминал. Се планираат и законски измени, според кои ЈО ќе мора редовно и континуирано да ја информира јавноста за својата работа и напредокот во предмети кои ги следат граѓаните. АКМИС системот мора да биде централизиран, а судовите да бидат поврзани вертикално и хоризонтално.
Следната точка е посветена на екологијата и енергетиката:
Заштита на животната средина и зелен развој
- До 2024 ниту една државна институција нема да се грее со стари и нееколошки системи за греење. Сите јавни институции се мапирани и ќе се донесат одлуки за најсоодветните решенија: (1) поврзање на централно парно греење, (2) на гас, (3) користење на високоефикасни инвертер клима уреди или (4) топлотни пумпи.
- До крај на 2020 воведуваме постојана 24/7 контрола на Државниот инспекторат за животна средина и локалните инспекторати, ги вмрежуваме државниот и локалните капацитети и ќе ги зголемиме нивните ингеренции. По акредитација на методи на нив ќе им биде ставена целосно на располагање Централната лабораторија за животна средина, а Државниот инспекторат секоја година ќе потпишува договори за соработка со акредитирани лаборатории за суперконтрола.
- Ќе ги заостриме казните само во областа на заштита на животната средина поради лошото искуство од неажурност на институциите и бирократско водење на постапките. За оние кои незаконски ја загадуваат животната средина и го загрозуваат здравјето поради профит ќе има и кривична одговорност. Секој кој ќе биде констатирано дека ги прекршил правилата и процедурите ќе ја изгуби лиценцата и дозволите поради неодговорно однесување и неисполнување на законските обврски.
- Првите две години на мандатот ќе бидат посветени на планско, но интензивно зазеленување на државата, а особено најзагадените градови. Согласно планот, ќе направиме: поставување на зелени коридори и бариери/ѕидови на критични точки како зелен ѕид на Клиничкиот центар Мајка Тереза, поголема запуштена површина ќе биде заменета со урбано зеленило и соодветна урбана опрема, обврска за зелени зони околу индустриските капацитети, пошумување во касарни.
- Започнуваме промена во политиките за јавен транспорт. Владата ќе даде поддршка на град Скопје кој започнува изградба на систем Bus Rapid Transport – брз транспорт со трамвај (со кредитна линија од ЕБРД). Ќе воведеме покомплексен систем на субвенции и даночни олеснувања за набавка на“еколошки” возила (на електричен и хибриден погон), замена на нееколошко гориво со гас кај транспортни средства (особено за транспортери на стоки, такси возила и сл.) и набавка на велосипеди.
Последниот шести пункт, посвете на меѓународната политика и дипломатијата, со акцент на претстојните преговори со ЕУ е насловен:
Влеговме во НАТО, можеме и во ЕУ
„Владата на Северна Македонија има амбициозен, но реален план: да ги заокружи преговорите што поскоро и што поуспешно и да стане држава членка на ЕУ при првиот нареден бран на проширување. Во 2020 година ги започнуваме преговорите за членство и убедени сме дека нашата држава има капацитет, способност и волја до 2024 година во мандатот на оваа Влада да отвори 80% од поглавијата и да биде најмалку на исто ниво на интеграција со државите од Западен Балкан кои во моментот преговараат за членство со ЕУ“,
се наведува во програмата.
Потоа се набројуваат политиките на идната влада во о0днос на преговарачкиот процес:
- Воспоставуваме мотивирана, ефикасна и професионална преговарачка структура;
- Обезбедуваме широк консензус помеѓу политичките партии, но и пошироко во општеството околу суштинските реформи врзани за нашето пристапување кон Европската унија. Ќе ги повикаме сите да го стават членството во ЕУ пред нивните политички интереси и да дадат поддршка на имплементацијата на ЕУ приоритетите и препораките на европските институции.
- Веќе развиваме база на податоци на сите домашни експерти и стручни лица од дијаспората кои активно ќе бидат вклучени во работните групи за преговори;
- Ќе создадеме услови за подобро инфраструктурното поврзување со Брисел. Ќе ја разгледаме можноста за потпишување стратешко партнерство со европски авиопревозник за воспоставување на директна, редовна линија со Брисел;
- Ќе направиме посебна буџетска програма за преговори со ЕУ во буџетите на министерствата и други надлежни институции;
- Во консултации со универзитетите ќе поддржиме нови или прилагодени образовни програми кои ќе градат кадри за потребите на државата во европските институции;
- Ќе имаме проактивна соработка со сите институции, политички партии, бизнис заедницата, граѓанскиот сектор и медиумите со цел да се доближи преговарачкиот процес до граѓаните. Преговараме во име на целата држава. Затоа, преговорите ќе ги опфатат сите: Владата, администрацијата, Собранието, регулаторите, граѓанскиот сектор, академската заедница, деловниот свет.