Антикорупциската комисија не е против вицепремиер за борба против корупција, но не знаат што тој планира да работи. Претседателката на Комисијата, Билјана Ивановска, за Алсат најави дека откако генералниот секретар на СДСМ, Љупчо Николовски, ќе биде изгласан како вицепремиер во оваа област, антикорупционерите ќе иницираат средба со него за да видат кои би биле неговите надлежности.
„Борбата против корупцијата не е само на Антикорупциска комисија, туку во таа борба треба да учествуваат сите. Модалитети може да има“,
вели Ивановска за ТВ Алсат.
Николовски на новата функција – вицепремиер за борба против корупцијата, ќе има улога на координатор на институциите кои се борат против корупција, најави мандатарот Зоран Заев.
„Имаме дефинирани сектори и одделенија за борба против криминалот и корупцијата во многу институции во државата. Тие си ја задржуваат својата изворна надлежност. Ако сакаме да постигнеме навистина резултати коишто не ние политичарите ќе ги кажеме, туку граѓаните, успешното координирање на ваквите процеси ќе дадат еден успех повеќе. Зашто, прво, за борба против криминал и корупција е Јавното обвинителство и судските органи. Тие по Устав и по закон си ја имаат својата надлежност. Тој може да се постави и во делот на превенцијата, и во делот на докажувањето, спроведувањето на етичките кодекси, организирањето на самите институции“,
рече Заев.