За двајца од осомничените, Обвинителството бара притвор за делата убиство и обид за убиство, притвор е предложен и за двајцата помагачи на сторителите по извршување на делото, а за еден од осомничените се бара куќен притвор. Останатите тројца осомничени се недостапни на органите на прогонот и по нив сè уште се трага
Вкупно осум лица се под истрага на Основното јавно обвинителство (ОЈО) Скопје во врска со престрелката што се случи ноќта меѓу 10 и 11 февруари во скопски Чаир, а во која загина едно лице.
Против шестмина од нив се води истрага поради учество во кривични дела убиство и обид за убиство, а постапката против другите две лица е за помагање по извршување на кривичното дело бидејќи по инцидентот сокриле два пиштоли, помагајќи им на дел од осомничените да не бидат откриени.
Изнесувајќи детали за настанот, од ОЈО Скопје информираат дека доцна вечерта на 10 февруари, по претходна расправија поради недоразбирање во сообраќајот, на паркинг на улицата „Втора Македонска Бригада“ во Чаир почнала вооружена престрелка меѓу две групи.
„Првоосомничениот 28-годишник, со употреба на огнено оружје, со умисла го лишил од живот оштетениот Хебиб Буњаку и го довел во опасност животот на уште едно лице. Уште петмина осомничени директно учествувале во престрелката, возвраќајки со дејствија на помагање и соизвршителство во убиство и обид за убиство. Последните двајца осомничени по престрелката сокриле два од пиштолите користени во инцидентот“,
наведуваат од скопското јавно обвинителство.
За двајца од осомничените, Обвинителството бара притвор за делата убиство и обид за убиство, притвор е предложен и за двајцата помагачи на сторителите по извршување на делото, а за еден од осомничените се бара куќен притвор. Останатите тројца осомничени се недостапни на органите на прогонот и по нив сè уште се трага.
„Се преземаат и натаму дејствија за целосно расчистување на настанот“,
додаваат од ОЈО Скопје.