Османи во својство на претседавач со ОБСЕ ја изразил својата поддршка за украинската влада, нагласувајќи дека ОБСЕ ги поддржува украинскиот народ и напорите за враќање на мирот и стабилизација на регионот
„Еден од првите чекори треба да биде итното враќање на теренската мисија на ОБСЕ во Украина. Мисијата ќе направи голема разлика на терен за обезбедување стабилност, безбедност и почитувањето човековите права за секој граѓанин”, порачал тој на средбата со Зеленски
Импресивна е пожртвуваноста и посветеноста на претседателот Зеленски во заштита на украинскиот народ и храброста во соочувањето со предизвиците и последиците од агресијата на Русија врз Украина, истакнал шефот на дипломатијата и претседавач со ОБСЕ, Бујар Османи, на средбата со украинскиот претседател Володимир Зеленски.
„Ја повикувам Русија веднаш да стави крај на агресијата“,
нагласил Османи, се наведува во соопштението за средбата.
Тој ја изразил својата поддршка за украинската влада нагласувајќи дека ОБСЕ ги поддржува украинскиот народ и напорите за враќање на мирот и стабилизација на регионот.
„ОБСЕ го поддржува украинскиот народ и ќе продолжи одблизу да ја набљудува состојбата. Неопходна е оваа поддршка на украинските напори да се врати мирот и да се изгради стабилна иднина за нејзините граѓани”,
истакнал Османи.
Тој како претседавач со Организацијата порачал дека ОБСЕ ги има механизмите и капацитетот да им помогне на луѓето од конфликтните подрачја преку работата на терен.
„Еден од првите чекори треба да биде итното враќање на теренската мисија на ОБСЕ во Украина. Мисијата ќе направи голема разлика на терен за обезбедување стабилност, безбедност и почитувањето човековите права за секој граѓанин”,
порачал тој.
Османи од денеска е во посета на Украина во рамките на реализацијата на еден од главните приоритети на претседавањето на Северна Македонија со ОБСЕ во 2023 година, чиј фокус е на луѓето на терен кои се најпогодени од воената агресија.
Претходно денеска Османи имаше средба со украинскиот министер за надворешни работи Дмитро Кулеба. По средбата, двајцата одржаа прес-конференција од која шефот на македонската дипломатија и претседавач со ОБСЕ, исто така, ја повикува Руската Федерација да ја запре војната, да ги повлече своите трупи од Украина, да се обврзе на принципите и вредностите на ОБСЕ и да ѝ се врати на дипломатијата.
Министерот за надворешни работи Бујар Османи, кој денеска е во својата прва посета на Украина во улога на претседавач со ОБСЕ, пред средбата со Кулеба, утринава по пристигнувањето во земјата се упати во градот Бородјанка во Киевската Област, кој е силно погоден од воените дејствија.
За време на посетата на Бородјанка, Османи уште еднаш нагласи дека Северна Македонија како земја претседавач со ОБСЕ ќе се залага да најде начин повторно да ја врати Организацијата во Украина, а како што додаде, комуникацијата со Русија ќе зависи од тоа како ќе се постави во однос принципите и заложбите на Организацијата, за што, како што кажа, тој како претседавач на ОБСЕ нема да дозволи никакви компромиси.
Украина е првата дестинација што Османи најави дека ќе ја посети како претседавач на ОБСЕ откако минатата недела во Виена ги презентира приоритетите на нашето претседавање со Организацијата.
Инаку, ова е втора работна посета на Османи на Украина. Тој ја посети земјата во мај минатата година, при што оствари средба со својот украински колега Дмитро Кулеба и други високи државни претставници на Украина.