На првичната прес-конференција по затворањето на гласачките места во 21 часот, од Демократската унија за интеграција (ДУИ) излегоа со силен оптимизам дека успеале во својата цел – да бидат во позиција да се избере првиот премиер Албанец.
„Иако сѐ уште ги очекуваме резултатите, ние сме горди на позитивната и моќна кампања за првиот премиер Албанец и за подобар живот на сите граѓани на Македонија. Вие сте тие што ќе ни ја донесете најголемата победа. Од тоа што го знаеме, ние сме уверени дека ја постигнавме нашата изборна цел – да го доведеме ДУИ во позиција да го избере првиот премиер Албанец. Ова е историски момент за Албанците, но и за сите граѓани на Република Северна Македонија“,
изјави шефот на изборниот штаб на ДУИ, Бујар Османи.
Пред да ја соопшти својата оценка, Османи им се заблагодари на сите граѓани што го остварија гласачкото право, но и на Државната изборна комисија и сите што биле вклучени во изборниот процес бидејќи тој се одржа во вонредни околности поради епидемијата на ковид-19.
Целата изјава на Османи можете да ја проследите во видеото подолу.