ЕУ требаше да сфати дека за Балканот брзината на кампањата за вакцинација беше поважна од вкупната количина на дози, вели министерот за надворешни работи во интервју за белгискиот весник „Ла Либр“
Северна Македонија е колатерална штета на неуспехот на фармацевтските фирми да ги исполнат нивните обврски во однос на испораката на вакцините против ковид-19, вели министерот за надворешни работи Бујар Османи.
„Уплативме 800 000 дози вакцини во рамките на Ковакс – механизмот, имаме и директен договор со ‘Фајзер’ за 800 000 дози. На овој начин сметавме дека сме сигурни и покриени со 1,6 милиони дози и дека тие се повеќе од доволни за да се имунизира нашето население. Но, сè уште не сме добиле ништо“,
вели Османи во интервју за белгискиот весник „Ла Либр“.
Тој смета дека поради ова, земјите од Западниот Балкан се влезени во регионален натпревар за добивање вакцини и со тоа станаа предмет на геополитичка конкуренција за вакцини.
„Владата одлучи да купи 200 000 вакцини од Кина, но нашата цел е да се заштитиме од овие геополитички размислувања. Идејата е да се започне кампањата за вакцинација. Се надеваме дека ова е само привремено решение сè додека конечно не ги добиеме платените вакцини“,
додава Османи.
Тој потсетува дека од појавата на пандемијата, регионот доби голема поддршка преку механизмите за солидарност на ЕУ или НАТО и беше интегриран во механизмите за набавка на санитарна опрема, со што земјите од Западниот Балкан добија чувство дека се дел од Унијата, но таквиот впечаток не продолжи и кога започна вакцинацијата.
„ЕУ требаше да сфати дека за Балканот брзината на кампањата за вакцинација беше поважна од вкупната количина на дози. Требаше да се биде сигурен дека кампањата може да започне на Балканот во исто време (со ЕУ). Тогаш заедно ќе се адаптиравме на отсуството или одложувањата во испораките на дози“,
смета Османи.