Антонио Милошоски од ВМРО-ДПМНЕ, како претседател на Комисијата за надворешна политика, возврати со барање за лоцирање политичка одговорност поради тоа што не добивме ниту преговарачка рамка ниту датум за преговори.
Од наша страна е сторено сѐ што треба, доволно сме подготвени и одложувањето на почетокот на преговорите беше грешка на самата Унија. Затоа не треба да не обзема апатија, песимизам, ниту некаков дефетизам. Процесот на одлучување во Унијата е сложен, со консензус, и ние на тоа мора да се навикнеме. Имаме навистина голем број пријатели во Унијата чии интереси за иднината на Европа се совпаѓаат со нашите. И немаме алтернатива. Нашиот стратегиски интерес останува ист – да донесеме повеќе Европа дома, а да ја однесеме Северна Македонија во ЕУ.
Ова денеска го истакна шефот на дипломатијата Бујар Османи реферирајќи пред пратениците за остварувањето на надворешната политика и меѓународната положба на Северна Македонија, на седницата на собраниската Комисија за надворешна политика.
Тој нагласи дека фокусот во моментов е секако на Бугарија и оти се уште е најдобра опцијата, со добра волја, да се интензивира спроведувањето на Договорот за пријателство, добрососедство и соработка и враќање на довербата на Софија во неговата ефикасност и имплементација.
Османи рече дека и покрај тоа што имавме турбулентна и тешка година, пандемија и постојана криза, членството во НАТО беше еден од најзначајните успеси што го обележа почетокот на годината, а добивме и одлука за почеток на преговори со ЕУ.
„Ја дочекавме и одлуката за почеток на преговори со Европската Унија. Гледано од денешен аспект. можеби изгледа збунувачки фактот што Советот на ЕУ сѐ уште не може да ја усогласи содржината на преговарачката рамка, но тоа не треба да го намали значењето на одлуката од март. Таа е одлуката што ја чекавме безмалку 15 години“,
рече Османи.
Османи потсети дека како нова членка на НАТО веднаш бевме сведоци на силната солидарност од нашите сојузници, кои обезбедија помош за нашиот здравствен сектор и за справување со последиците од ковид-19.
„Како земја длабоко интегрирана во европскиот политички систем, Северна Македонија беше вклучена и во европскиот договор за јавни набавки за медицинска опрема и системот на ЕУ за брзо предупредување за заразни болести. Понатаму, ЕУ ја ослободи земјава од рестрикциите за извозот на медицинска опрема, ставајќи ја со тоа под внатрешниот заштитен чадор на Унијата, рамо до рамо со земјите членки“,
потсети Османи и додаде дека ЕУ директно обезбеди 66 милиони евра за итни потреби при справувањето на Северна Македонија со кризата со коронавирусот.
Османи рече дека како прв приоритет во неговиот мандат ги поставил добрососедските односи.
„Гледано само од денешниот агол и однесувањето на нашиот сосед Бугарија, оваа амбиција не влева оптимизам, туку повеќе изгледа утопистичка и неостварлива. Но ве уверувам дека не е така. Не случајно мојата прва официјална посета беше токму на Софија, и оттогаш наваму комуникацијата меѓу министерствата за надворешни работи, и воопшто меѓу двете држави постојано се интензивира на повеќе нивоа“,
истакна шефот на дипломатијата.
Потсети дека се формирани работни групи на двете министерства кои, посочи, работеа на сите отворени прашања и загрижености кои изминатиов период се таложеле кај нашиот сосед.
„Беа разменети многубројни документи во форма на предлог-меморандуми, нон-пејпери, предлог декларации, како креативна можност да се најде компромис кој ќе врати довербата во процесот, без да предизвика нарушување на идентитетските атрибути на македонскиот народ. И оваа црвена линија не само што никогаш не сме ја преминале, туку под целосна одговорност ви тврдам дека за овие прашања никогаш не сме ни преговарале“,
истакна Османи.
Изрази уверување дека постои волја и кај нас и кај Бугарија и оти е потребно уште малку напор. Додаде и дека во приоритетите на надворешната политика се и другите соседи, кои секако не треба и не се запоставени поради актуелните предизвици со Бугарија.
Потсети на успешниот Берлински процес, со кој копретседаваа С Македонија и Бугарија.
Претседателот на Комисијата, Антонио Милошоски од ВМРО-ДПМНЕ, праша кој ќе ја сноси политичката одговорност поради тоа што не добивме ниту преговарачка рамка ниту датум за преговори.
„Министерот Османи, премиерот Заев и вицепремиерот Никола Димитров пред целата македонска јавност не само што обзнанија дека имаме датум за почеток на преговорите со ЕУ, туку имаше и своевидни прослави на тој датум, имаше билборди, музички настани, и слично. Истиот министер денес пред нас кажува дека датум нема. Нема ниту заклучоци за жал, ниту преговарачка рамка, уште помалку датум за почеток на првата меѓувладина конференција. Моето прашање е – кој ја носи политичката одговорност за ваквиот неуспех. Сметам дека доколку ја лоцираме таквата политичка одговорност, ќе можеме полесно да се носиме со предизвикот во текот на 2021 година. Доколку одбегнуваме и наоѓаме изговори, тогаш ова обраќање нема да биде ништо поразлично од обраќањата што во изминатите четири години сме ги слушале од министрите за надворешни работи“,
рече Милошоски.
Османи потсети на стратегиските приоритети на земјава и одговори дека најуспешната година во постигнување на нашите стратегиски цели во евроатлантските интеграции којашто ќе се памети е 2020 година.
Како посебен дипломатски успех тој ја посочи едногласната одлука за прифаќање на нашата кандидатура за претседавање со ОБСЕ во 2023 година.
Подвлече дека од аспект на поширокиот меѓународен контекст, стратегиско партнерство со САД претставува еден од најважните столбови на нашата дипломатија, како нераскинлив дел од севкупната државна стратегија. Ѝ се заблагодари на досегашната администрација предводена од Доналд Трамп, секако, како што рече, со огромни очекувања за континуитет на нашето стратегиско партнерство и од следната администрација предводена од Џо Бајден.
Истакна дека во 2021 ќе продолжат да се пополнуваат испразнетите амбасадорски места со што, рече, ќе се зајакне дипломатско-конзуларната мрежа.
Османи заклучи дека најважен приоритет останува нашиот пат за членство во ЕУ.