Владеењето на правото со видливи резултати и борбата против криминалот и корупцијата се важни европски реформи за земјава, порача Османи од Рим
Европските реформи мора да продолжат и ние остануваме цврсто на патот кон европските интеграции, рече министерот за надворешни работи Бујар Османи по средбата со неговиот италијански колега Луиџи ди Мајо во Рим.
Работната посета на Османи во Рим се случува во важен момент за процесот на проширување на Европската Унија, а двајцата соговорници се согласиле дека отворањето на пристапните преговори ќе донесе повеќекратна корист, и за Северна Македонија, за регионот, но и за кредибилитетот на заложбите на ЕУ за довршување на процесот на европското обединување.
„Европските реформи мора да продолжат, особено во областите на владеењето на правото, со видливи резултати и во борбата против криминалот и корупцијата. Ние мора целосно да ја завршиме и нашата подготовка за почеток на преговорите, да ја дооформиме преговарачката структура, да ги зајакнеме капацитетите за преговарање. Исто така, мора да продолжи усогласувањето со европските правила и стандарди во рамките на процесот на стабилизација и асоцијација, да продолжи и имплементацијата на европското законодавство, како и да продолжат сите оние активности што условно имаат европски контекст“,
изјави шефот на македонската дипломатија.
Османи и Ди Мајо разговараа и за можностите за продлабочување на билатералните односи во повеќе сегменти, како и соработка за справување со здравствените и социо-економските последици предизвикана од пандемијата, како и за процесот на имунизација како важен елемент за надминување на кризата.
„Италија во континуитет е меѓу топ десетте земји според големината на трговската соработка со Северна Македонија, која надминува половина милијарда евра, а во 2019 година достигнува дури 720 милиони евра. Ова претставуваа значаен придонес во нашата економија, но со оглед на политичката поддршка, географската близина и традиционалната соработка, сметам дека постои потенцијал за уште поголема економска активност, особено за италијанските инвестиции, кои се повеќе од добредојдени во Северна Македонија“,
рече Османи.
Во текот на денот Османи ќе се сретне и со претседателот на Комисијата за надворешни работи при Долниот дом на италијанскиот Парламент, Пиеро Фасино.
Посетата на Рим Османи ќе ја искористи и за посета на Светата Столица каде што ќе има средба и со ватиканскиот секретар за односи со државите, монсињор Пол Ричард Галагер.