Во фокусот на состанокот биле актуелните безбедносни состојби, со акцент на зајакнувањето на поддршката за Украина, а министрите се осврнале и на одлуките што треба да се усвојат на самитот на НАТО во Вашингтон
Од суштинско значење е интегрирањето на Западен Балкан за консолидирање на стабилноста во регионот и превенирање од дестабилизирачки влијанија од трети страни. ЕУ-перспективите на Западен Балкан треба да се сметаат како стратегиска безбедносна политика, рекол министерот за надворешни работи Бујар Османи на денешниот неформален состанок на министрите за надворешни работи на земјите членки на НАТО, кој се одржува во Прага.
Од Министерството за надворешни работи информираат дека во фокусот на состанокот биле актуелните безбедносни состојби, со акцент на зајакнувањето на поддршката за Украина, а министрите се осврнале и на одлуките кои треба да се усвојат на самитот на НАТО во Вашингтон.
Османи во обраќањето се осврнал на потребата од забрзување на евроатлантските интегративни процеси.
Од МНР додаваат дека Османи ги истакнал веќе познатите позиции на нашата земја нагласувајќи дека Северна Македонија е цврста во поддршката за Украина, од почетокот на руската агресија.
„Исто така, нагласи дека како кредибилна членка на Алијансата, земјава веќе го надмина долниот праг од 2 отсто од БДП за инвестициите во одбраната, а потенцираше и дека е силен поддржувач на политиката на отворени врати на Алијансата“,
информираат од Министерството за надворешни работи.
Османи денеска на маргините на неформалниот состанок на НАТО во Прага се сретнал со државниот секретар на САД, Ентони Блинкен, соопштија од МНР.
На средбата, како што информираа од МНР, се разговарало за актуелните настани во Северна Македонија, при што Османи брифирал за неопходноста од продолжување на евроатлантскиот пат на земјата, како клуч за стабилноста.