Остануваат уште две недели за да се надминат разликите со Бугарија, а јуни ја дава најдобрата шанса за почеток на преговорите, порача денеска министерот за надворешни работи Бујар Османи. Тој го повтори ставот дека има сериозен ангажаман на португалското претседателство, а предлогот кој беше презентиран минатата недела при посетата на Вархеји и Силва, за македонските власти претставува добра основа за надминување на разликите.
„Сметаме дека португалскиот предлог ги адресира сензитивностите на трите страни, нашата страна, бугарската страна и на земјите членки коишто очекуваат дека преговарачкиот процес нема да биде контаминиран со билатерални прашања и дека тоа може да биде добра основа за надминување на разликите,“
изјави Османи.
Османи додаде дека продолжуваат со враќањето на довербата со Бугарија и дека имаат конструктивна меѓусебна реторика во комуникацијата меѓу двете држави.
„ Овие контакти коишто се случија, се важни во враќањето на таа дверба и очекувам таа комуникација да се интензивира во наредниот период. Да се обидеме да ги адресираме сензитивностите и на бугарската страна, меѓутоа се разбира запазувајќи ги и нашите сензитивности во однос на прашањето, потенцираше министерот за надворешни работи“
додаде Османи.
Шефот на дипломатијата изрази жалење за тоа што сѐ уште нема назначено амбасадор во Софија, но појасни дека при крај се консултациите помеѓу претседателот на државата, премиерот и Министерството за надворешни работи за да се определи кандидат за оваа функција.