Воен авион на Чешката Република со помош од милион медицински маски за справување со ковид-19 попладнево пристигна на Меѓународниот аеродром – Скопје.
Донацијата ја прими вицепремиерот за европски прашања Бујар Османи, во улога на национален координатор за странска помош во земјава. Предавањето го направи чешкиот амбасадор во земјава, Мирослав Томан.
Османи се заблагодари на помошта од чешката Влада и чешкиот народ во износ од милион заштитни маски кои, како што рече, ќе бидат наменети за поддршка на здравствениот систем.
„Преку амбасадорот Томан сакам да ја пренесам пораката на искрена и длабока благодарност до чешката Влада. Оваа поддршка ќе биде запаметена и граѓаните ќе бидат благодарни. Ова не е прашање само на борба против ковид-19, ова е покажување на дело на солидарноста помеѓу две пријателски земји“,
рече Османи.
Тој смета во оваа пандемија на дело се покажува европската солидарност и најави дека продолжуваат со другата соработка во рамки на Европската Унија и во рамки на Европскиот солидарен фонд односно во делот на заедничката набавка на медицинска опрема за која денеска земјава пуштила барање.
Амбасадорот на Чешка во земјава, Томан рече дека неговата земја продолжува со билатералната поддршка за Северна Македонија и во таа насока денеска пристигнаа еден милион медицински маски.
„Сметам дека тоа е еден огромен износ, но свесни сме дека нашите пријатели имаат потреба од оваа помош. Се надеваме дека оваа донација ќе помогне особено на оние кои се во првите редови кои се борат со коронавирусот – лекарите, медицинскиот персонал, полицијата… Сите ние ним треба да им се заблагодариме за тоа што го прават. Ако не сме заедно, нема да ја добиеме оваа битка. Се надевам дека оваа помош ќе донесе мало олеснување и истата е голем доказ за пријателството меѓу двете земји“,
истакна амбасадорот Томан.