Во објавата на фејсбук, министерот Бујар Османи вели дека денеска упатил формална ургенција до претседателот на Комисијата, Антонио Милошоски, за како што вели, веднаш да престане бојкотирањето на надворешната политика и стратешкиот интерес на земјата, и во најкраток можен рок да биде закажана седницата за одбрана на тезите на идните амбасадори
Министерот за надворешни работи Бујар Османи денеска преку фејсбук-статус повика во најкраток можен рок да биде закажана седница на собраниската Комисија за надворешна политика на која кандидатите за идни амбасадори ќе имаат прилика да се претстават, како што вели Османи, не само пред пратениците, туку и пред граѓаните.
Во објавата на фејсбук, министерот вели дека денеска упатил формална ургенција до претседателот на Комисијата, Антонио Милошоски, за како што вели, веднаш да престане бојкотирањето на надворешната политика и стратешкиот интерес на земјата, и во најкраток можен рок да биде закажана седницата за одбрана на тезите на идните амбасадори.
„Незакажувањето на седницата на Комисијата за надворешни работи при Собранието на Република Северна Македонија претставува флагрантна, можам да кажам дрска злоупотреба и на Деловникот за работа на Комисијата и воопшто на учеството на Собранието како посебно тело во надворешната политика“,
реагира Османи на фејсбук.
Според Османи, претставувањето на кандидатите за амбасадори пред Собранието има посебна политичка и општествена улога во целиот процес на испраќање амбасадори во странство. Тоа, како што додава, е последниот чекор на еден долг процес во кој не само народните избраници, туку и граѓаните имаат можност директно да ги видат и слушнат идните нивни претставници во странство не само како ги образложуваат тезите, туку и како одговараат на сите поставени прашања.
„Одложувањето на овој процес, особено своеволно, непотребно, и без пристојно образложение, претставува длабок политички хендикеп за надворешната политика и за остварувањето на стратешките цели на земјава“,
пишува Османи додавајќи дека тоа воедно создава и дополнителни предизвици за самите кандидати и нивните семејства.
Минатиот месец, пред членовите на Комисијата зад затворени врати, своите тези за дипломатските активности ги презентираше новоименуваниот амбасадор на Република Северна Македонија во Соединетите Американски Држави, Зоран Попов.
Покрај него, пред Комисијата треба да се претстават и новите амбасадори во Канада, Агрон Буџаку, во Кралството Норвешка, Дритон Куќи, во Република Словачка, Евгенија Илиева, како и вонредниот и ополномоштен амбасадор на земјава во Кралството Белгија, Методија Белевски.