Договорот за оваа авиолинија беше потпишан на 25 јануари годинава на меѓувладината седница што се одржа во Софија. Авионското поврзување меѓу Северна Македонија и Бугарија беше и првиот чекор на конкретизирање на соработката што ја најавија двајцата нови премиери
Прекинот на продажбата на билети за авиолинијата Софија-Скопје најверојатно е поради преговорите на компанијата „Гуливер“ со бугарската влада околу субвенционирањето на оваа авиолинија, вели шефот на дипломатијата Бујар Османи.
Авиолинијата почна да функционира од март, а сега според информациите таа ќе продава билети до 21 мај.
„Кога го разгледувавме ова прашање, разговаравме за две опции. Првата опција беше да биде целосно комерцијална, односно дали ќе има интерес од страна на патниците, а втората опција – да биде субвенционирана од страна на владите при што Република Бугарија ја презеде обврската за субвенционирање. Мислам дека првата фаза беше обид да се види комерцијалната рентабилност. Според моите информации, мислам дека ова запирање е процес на преговори меѓу компанијата и владата дали ќе има поддршка или не“,
изјави Османи.
Според него, би било добро доколку продолжи функционирањето на оваа авиолинија.
Од Владата, пак, денеска изјавија дека компанијата има одобрено термини за полетување и слетување и во текот на овој месец.
„Во однос на авиолинија Софија – Скопје, Ве информираме дека авиокомпанијата која го оперира овој лет нема склучено договор за финансиска поддршка со Владата на Република Северна Македонија, преку Министерството за транспорт и врски. Според информации со кои располагаме, авиокомпанијата има одобрено термини (слотови) за полетување и слетување и во текот на овој месец“,
одговорија од Владата за државната агенција МИА упатувајќи дека повеќе информации треба да се побараат од компанијата со оглед дека станува збор за комерцијален лет.
Авиолинијата беше најавена од бугарска страна како еден од чекорите за враќање на добрата волја во дијалогот помеѓу двете држави. Договорот беше потпишан на 25 јануари годинава за време на меѓувладината седница што се одржа во Софија. Авионското поврзување меѓу Северна Македонија и Бугарија беше и првиот чекор на конкретизирање на соработката што ја најавија двајцата нови премиери Димитар Ковачевски и Кирил Петков на нивната прва средба во Скопје на 18 јануари.