Унгарскиот премиер вели дека неговата партија не може да прифати дека правата на членките на ЕПП се ограничуваат со амандман
Унгарскиот премиер Виктор Орбан ја критикуваше денеска Европската народна партија (ЕПП) дека се занимава со внатрешни игри додека остатокот на Европа се бори против пандемијата на коронавирусот.
Партијата на Орбан (Фидес) неодамна ја напушти парламентарната група на ЕПП во Европскиот парламент, каде што беше под суспензија подолго време.
„Додека ние во Унгарија и другите лидери во нивните земји буквално се бориме на живот и смрт со коронавирусот, ЕПП води игри за надмоќ во бирократскиот меур во Брисел“,
истакна Орбан во писменото обраќање.
Тој додаде дека тоа е „неприфатливо“ и дека пратениците на Фидес ја напуштиле парламентарната група на ЕПП, одбивајќи да прифатат дека „правата на членовите на ЕПП ќе бидат ограничени со амандман на статутот на групата“.
Орбан нагласи дека излегувањето на Фидес од групата на ЕПП отворило нова перспектива во европската политика.
Унгарскиот премиер изјави дека Унгарците сакале ЕПП да се врати на старата позиција како водечка интелектуална и политичка сила во Европа, но таа можност е изгубена вчера бидејќи, според него, ЕПП станала „анекс на европската левица“.