Многу луѓе на север бараат засолниште во училиштата на УНРВА, бараат засолниште во болниците. Бев во една од болниците оваа недела, има стотици и стотици пациенти кои не можат да се движат, вели шефот на Агенцијата на ОН за помош на палестинските бегалци
Стотици пациенти се заглавени во болниците во северниот дел на Газа и физички е невозможно да се евакуираат на југ, изјави шефот на Агенцијата на ОН за помош на палестинските бегалци (УНРВА), Том Вајт, пренесува Би-би-си.
Според Вајт, невозможно е да се преселат пациентите од болниците како Ал-Кудс во северна Газа, а таквиот став го имаат и лекарите и другите добротворни организации. Палестинската Црвена полумесечина соопшти дека Израел вчера им рекол да ја евакуираат болницата бидејќи во близина одекнувале воздушни напади.
„Многу луѓе на север бараат засолниште во училиштата на УНРВА, бараат засолниште во болниците. Бев во една од болниците оваа недела, има стотици и стотици пациенти кои не можат да се движат“,
вели Вајт.
Тој рече дека многу луѓе на север – не само пациенти – исто така не можат да се движат наоколу бидејќи физички немаат транспорт, немаат средства.
„Луѓето се многу гладни, жедни и исплашени, а многумина живеат од остатоци од леб и конзервирана храна што повремено успеваат да ги добијат“,
додава Вајт.
Утрово Израелските одбранбени сили (ИДФ) соопштија дека убиле десетици борци на Хамас во текот на ноќта кога ги зајакнале своите копнени операции во Газа.
Покрај тоа, во текот на изминатите неколку дена, ИДФ погоди повеќе од 600 терористички цели, вклучително и складишта за оружје, десетици локации за лансирање противтенковски ракети, како и засолништа и собирни места што ги користи терористичката организација Хамас, се додава во изјавата.
Денеска и од Агенцијата за детска помош на ОН, УНИЦЕФ, рекоа дека поради катастрофалната ситуација во Газа родителите мора на децата да им даваат солена вода бидејќи немаат друг избор.