Основното јавно обвинителство Гостивар ќе спроведе истражна постапка против мајката на детето што животот го загуби во вчерашниот пожар, а за кое се утврди дека било врзано со синџири.
Мајката е осомничена за кривично дело повреда на семејни обврски, предвидено и казниво согласно член 203 став 2 во врска со став 1 од Кривичниот законик.
„Осомничената, во текот на 2021 година, со груба повреда на своите законски семејни обврски го малтретирала своето дете на возраст од 7 години, кое го врзувала со синџир и катанец за креветот. На 16 март, во станот во кој престојувало семејството избувнал пожар, a затоа што било врзано за креветот детето не успеало да го напушти домот и го загубило животот“,
информираат од Обвинителството.
Јавниот обвинител до судијата на претходна постапка од Основниот суд во Гостивар доставил и предлог за определување мерка притвор за 36-годишната осомничена. За наведеното кривично дело во Кривичниот законик е предвидена казна затвор од најмалку пет години.
Во меѓувреме, сè уште се работи на утврдување на причините за пожарот. Останатите малолетни деца на осомничената се згрижени преку Центарот за социјална работа во Гостивар.