Во постапката што се води пред ОЈО ГОКК, на 10 август 2026 година скопскиот кривичен суд донел две пресуди врз основа на предлог-спогодби склучени со двајца осомничени. Со спогодбите осомничените признаа дека го сториле кривичното дело што им се става на товар и им се изречени казни затвор во траење од три години и шест месеци, односно три години и осум месеци
Основното јавно обвинителство за гонење организиран криминал и корупција (ОЈО ГОКК) ја прошири истрагата за меѓународниот синџир за шверц на марихуана од Северна Македонија во Србија. Врз основа на нови докази и меѓународна соработка со српските органи, донесена е нова наредба за истражна постапка против уште седум лица, со што се зголемува бројот на инволвирани во оваа криминална мрежа.
Во меѓувреме, додаваат од Обвинителството, во постапката што се води пред ОЈО ГОКК, на 10 август 2026 година скопскиот кривичен суд донел две пресуди врз основа на предлог-спогодби склучени со двајца осомничени. Со спогодбите осомничените признаа дека го сториле кривичното дело што им се става на товар. Притоа им се изречени казни затвор во траење од три години и шест месеци, односно три години и осум месеци.
Новоосомничените се товарат за кривично дело неовластено производство и пуштање во промет наркотични дроги, психотропни супстанции и прекурсори.
Според обвинителството, криминалната група дејствувала од засега неутврден период во текот на 2025 година до крајот на јануари 2026 година. Од ОЈО ГОКК велат дека шестемина против кои се води постапка во Р Србија, шестемина опфатени со истрагата на Обвинителството од февруари, седумтемина новоосомничени, како и други засега непознати лица, се здружиле заради неовластена продажба и пуштање во промет наркотична дрога марихуана. Секој од нив имал определена улога, при што самите или преку други непознати лица преземале, држеле и пренесувале наркотична дрога марихуана заради нејзина понатамошна неовластена продажба и пуштање во промет на територијата на Република Србија и други држави.
Како параван за илегалните активности било користено правно лице од Скопје кое имало официјално одобрение за одгледување канабис за медицински цели и дозвола за производство на екстракти од канабис за медицински потреби.
Сопствениците на правно лице од Скопје, од кои едниот е и управител, заеднички и по претходен договор организирале и други засега непознати лица од двете земји за заеднички да набавуваат наркотична дрога марихуана и во повеќе наврати да ја транспортираат од Македонија во Србија.
„За таа цел користеле товарни возила и царински декларации со кои се прикажувало дека се превезува текстилна, прехранбена и друг вид стока. Откако наркотичната дрога ќе била пренесена преку државната граница, организирале нејзино складирање во месноста Коњух кај Крушевац, каде што марихуаната се препакувала и дистрибуирала за натамошна продажба“,
се наведува во соопштението од ОЈО ГОКК.
Истиот начин на дејствување бил организиран најмалку во пет транспорти. Од товарните возила со веќе царинета и пломбирана стока се отстранувала пломбата, се вадел дел од стоката што бил текстил или храна, а на нејзино место се ставале кутии со марихуана со идентична тежина.
Дрогата била транспортирана преку граничниот премин „Табановце“, скриена меѓу прехранбени производи, перници и јоргани, додека камионите биле следени од членови на групата со патнички возила.
Од ОЈО ГОКК додаваат дека на 21 јули 2026 година, српското Јавно обвинителство за организиран криминал поднело обвинителен акт против шест членови на групата. Српското обвинение укажува дека сопствениците на скопската фирма директно давале инструкции за складирање и препакување на дрогата во Крушевац во магацински простор на правно лице, чиј сопственик и управител е исто така обвинет.
„Дел од дрогата потоа се складирала во помошни објекти во неговиот дом во Коњух, каде било организирано нејзино препакување за натамошна продажба, по што марихуаната наменета за продажба на територијата на Белград му била предавана на друг обвинет член на групата“,
се додава во соопштението.