36-годшниот жител на Струга, истиот ден кога се вратил од Данска, заминал за Албанија и истиот ден се вратил во земјава, а пред два дена не бил пронајден дома иако потпишал изјава за задолжителна самоизолација
Основното јавно обвинителство Струга до Основниот суд во Струга поднесе предлог за изрекување казна од 100 дневни глоби по 40 евра во денарска противвредност на возач на камион од Струга
поради непостапување според здравствените прописи за време на епидемија, дело казниво по член 206 став 1 од Кривичниот законик.
Како што соопшти ОЈО, се работи за 36-годишен жител на струшкото село Драслајца, возач на камион кој на 16 март пристигнал на граничниот премин Табановце и пријавил дека патувал од Данска како земја со среден ризик за зараза со вирусот ковид-19. На граничниот премин бил запознаен со определените мерки за сузбивање и спречување на внесување и ширење на вирусот и потпишал изјава за задолжителна самоизолација во период од 14 дена во неговиот дом. Но, уште истиот ден се јавил за излез кон Албанија на граничниот премин Ќафасан, каде што преминал и повторно се вратил во државава истиот ден преку истиот граничен премин. На 18 март при контрола дали ги почитува мерките за самоизолација, тој не бил затекнат во домот.
Денеска СВР Охрид и ОВР Кичево исто така поднесоа кривични пријави против три лица поради прекршување на истиот член од КЗ.