Шефицата на германската дипломатија Аналена Бербок смета дека понудениот компромисен предлог изготвен од француското претседателство пружа шанса која Северна Македонија не смее да ја пропушти. Според неа, искористувањето на оваа можност е од огромен стратешки интерес за ЕУ и за Северна Македонија.
„Западниот Балкан не само што е во срцето на Европа, туку се наоѓа и во моето срце. Неговата иднина мора да е во ЕУ. Компромисот претставен од француското претседателство за почеток на преговорите со Северна Македонија е шанса која не смее да биде пропуштена. Можноста треба да се зграпчи бидејќи е од стратешка важност и за ЕУ и за Северна Македонија. Сега е време да тргнеме напред“,
напиша Бербок на својот налог на Твитер.
Претходно, со сличен став излезе и претседателот на Европскиот Совет, Шарл Мишел. Тој оцени дека францускиот предлог за надминување на бугарската блокада на Северна Македонија во ЕУ ги адресира грижите на Скопје и на Софија.
„Поблиску сме од било кога: сега е време да се каже ‘да’,
напиша Мишел во својата објава на Твитер, поздравувајќи го компромисното решение кое го содржи новиот француски предлог.
Францускиот претседател Емануел Макрон денеска од Мадрид соопшти дека Северна Македонија и Бугарија постигнале компромис за надминување на спорот околу содржината на Преговарачката рамка со која Скопје треба да ги води преговорите со ЕУ.
„Мислам дека најдовме компромис околу спорот меѓу Бугарија и Северна Македонија за Преговарачката рамка за влез во ЕУ“,
изјави францускиот претседател Емануел Макрон на маргините на самитот на НАТО во Мадрид.
Македонската влада попладнето информираше дека „пристигнал предлог со идеи“ од француското претседателство со ЕУ.
„Ова претставува основа за отворање на широк консултативен процес најпрво во Владата и коалициските партнери, а потоа и со Претседателот на државата, со Парламентот и со опозицијата, како и со граѓанскиот сектор, експертската и севкупна јавност во земјата“,
соопштија од македонската влада.