Од КСС велат дека Владата и другите надлежни институции не требало да дозволат да дојде до злоупотреба на Уредбата за парична помош на компаниите
Неформирањето влада и свесното одолговлекување на нејзиното формирање влијае на целата ситуација во која се наоѓаме со корона -кризата, пред се од здравствен, а потоа и од економски аспект.
Ова се наведува во денешнпто соопштени на Конфедерацијата на слободни синдикати на Македонија (КСС), и покрај тоа што, според Уставот, роковите за фомирање на новата влада почнуваат да течат по конститутивната седница на новиот парламент.
„Секое економско продлабочување на кризата води кон социјална криза и губење голем број работни места или значително намалување на и така нискиот приход кој вработените го имаат“,
велат од КСС.
Големи социјални последици, како што велат од КСС, ќе претрпат и работниците кои се дел од неформалната – сива економија, сезонски работници, долгорочно невработените, особено оние работници кои се пријавени на минимална плата која не сооодветствува со степенот и сложеноста на работата, а остатокот од платата го добиваат на рака. Ваквите работници, наведуваат, или воопшто не го добиваат овој дел или го земаат во намален износ.
– Македонија, со своето управување од страна на тековната влада, покажа дека во време на криза не знае да ги употребува средствата за стабилно управување со сложени ситуации, како што е социјалниот дијалог. Синдикатите не беа или делумно беа консултирани за прашања кои се однесуваат за ускратување на права од работен однос, како што беше обидот за кратење на платите, надоместоците на плата, правото на користење на годишен одмор и сл. Понатаму тие уредби паѓаа на Уставен суд,
велат од КСС и додаваат дека заради надминување на социјалната криза мора да постои социјален дијалог со кој ќе се направи превентива за спречување на вакви кризи.
Оттаму посочуваат дека тие, како национален синдикат, имаат за цел да ги заштитуваат правата на работниците и, како што посочуваат, стојат на располагање да ги консултираат и на тој начин позитивно да влијаат кон пошироката јавност со цел да се одбегне социјалната криза што во нашата држава е веќе присутна.
„Мораме да ја споменеме и злоупотребата на Уредбата за финансиска помош на компаниите кои примиле помош од државата, а не ги исплатиле платите. Оваа злоупотреба најостро ја осудуваме и сметаме дека Владата и релевантните државни институции не требало да дозволат да се злоупотреби уредбата, дека компаниите треба соодветно да се санкционираат, а работниците во најкус можен рок да се обесштетат. Покрај оваа злоупотреба, до нашата правна служба имаме пријавено и случаи каде се прекршува правото на користење на годишен одмор каде работодавачите најчесто ги одобруваат барањата, а потоа за време на годишниот одмор се повикуваат вработените на работното место“,
нагласуваат од КСС.