Оваа комуникација, како што тврди Русковска, обвинителството ја „извадило“ од предметите на СЈО што ги презеде по неговото згаснување и затоа сега во завршницата на судскиот процес ги предложи како дополнителни докази
Пораки од комуникацијата на двајцата поранешни министри, Миле Јанакиески и Спиро Ристовски, презентираше обвинителката Вилма Русковска на денешното рочиште за организацијата на „27 април“, со кои смета дека ја побива одбраната дека обвинетите не биле дел од организацијата на протестите.
Сите пораки на Јанакиески што ги презентираше Русковска се, како што рече, со број што го користела тогашната министерка за култура Елизабета Канческа-Милевска. Комуникацијата е во периодот од крајот на февруари до крајот на март 2017, односно еден месец и неколку дена пред упадот во Собранието. Содржината на пораки е поврзана со протестите што секојдневно се организираа тој ден преку иницијативата „За заедничка Македонија“ и од нив најмногу можеше да се слушне како Јанакиески и Канческа-Милевска зборуваат за тоа кој од јавните личности би се обратил за време на протестните маршеви.
Дел од комуникацијата од 27.2.2017:
Јанакиески: Ај некој од Скопје за ПП; 18 часот утре.
Канческа-Милевска: Ок.
Јанакиески: Вака, ПП и Куманово 17ч, а Штип и Кичево 18 … и СК 18.
Дел од комуникацијата од 28.2.2017:
Јанакиески: За утре гледај да го пратиш Владо Јовановски, ќе залепи многу јако. Ај за мој ПП.
Канческа-Милевска: Да оди во Прилеп?
Јанакиески: Да.
Канчевска-Милевска: Договорено. Мора да има уште повеќе луѓе утре, мора.
Дел од комуникацијата на 1.3.2017:
Канческа-Милевска: Миле сега се слушнав со Игор Дурловски, патува за Битола, има некоја претстава. Може и да зборува на протестот, мислам дека добро ќе го прифатат битолчани.
Јанакиески: Нека збори, топ ќе биде.
Во комуникацијата тие споменуваат и други пејачи, актери, сликари, академици…, кои би се обратиле на протестите. Исто така, во дел од пораките се споменуваат и реквизити што се користеа на протестите:
Дел од комуникацијата на 1.3.2017:
Канческа-Милевска: Свирчиња ми требаат. И труби. Многу ми требаат.
Јанакиески: Нели има.
Канческа-Милевска: кај има?
Јанакиески: Нело има.
Канческа-Милевска: На Јаков му требаат за другарите
Дел од комуникацијата на 2.3.2017
Јанакиевски: Те молам, собери ги сите тапани на свет, многу ни требаат денеска.
Канческа-Милевска: Најдовме нешто, ќе ти кажам кога ќе дојдам.
Од каде се појавија овие пораки?
Оваа комуникација, како што тврди Русковска, обвинителството ја „извадило“ од предметите на СЈО што ги презеде по неговото згаснување и затоа сега во завршницата на судскиот процес за „27 април“ ги предложи како дополнителни докази. За кои предмети СЈО претходно го нарачувала вештачењето на телефоните, Русковска рече дека точно не може да каже.
„Јас, лично, сметам дека со овие докази кои сега се изведуваат неспорно се докажа улогата во организирање на протестите на политичката партија ВМРО-ДПМНЕ, како и на обвинетите лица кои се во судницата, а тоа се Миле Јанакиески и Спиро Ристовски“,
вели Русковска.
Таа смета дека со ова паднале во вода исказите на многубројните сведоци што ги повикуваше одбраната и кои тврдеа дека ниту Ристовски и Јанакиески ниту ВМРО-ДПМНЕ ги организирале протестите.
За разлика од неа, пак, одбраната смета дека ова не е доказ оти поранешните функционери го организирале упатот. Потенцираат дека последните пораки што ги презентираше Русковска датираат еден месец пред 27 април 2017 година, но и тоа што во нив никаде не се споменува насилство или упад во законодавниот дом. Адвокатот Еленко Миланов рече дека според одбраната пораките не се доказ дека Јанакиески организирал, туку само дека давал поддршка.
„Поддршката сметам дека никој во ниеден момент не ја оспори дека имало индивидуална, поединечна поддршка и многу од овие сведоци кои дојдоа, изјавија дека по сопствена волја биле на тие протести и тоа го правеле лично, а не партиски организирано“,
рече адвокатот Миланов.