Игор Ангеловски, поранешен началник на СВР Велес, починал синоќа на Инфективната клиника во Скопје како последица на ковид-19.
Тој првично се лекувал во велешката Општа болница на Инфективното одделение од 7 до 14 октомври кога поради пад на сатурација итно бил префрлен на Инфективната клиника во Скопје, информира за МИА, д-р Весна Неделковска-Николова, портпарол на ЈЗУ Општа болница Велес.
„Последните два дена беше на кислородна поддршка и два дена имаше пад на сатурацијата, која не сакаше да се покачи. Поради тоа, одлучивме и итно на 14 октомври го пренесовме на понатамошно лекување на Инфективната клиника во Скопје“,
појасни д-р Неделковска-Николова.
На Инфективната клиника Ангеловски бил неколку дена приклучен на респиратор.
41-годишниот магистер по дефендологија, Игор Ангеловски, беше началник на СВР Велес од 10 јануари до 27 јули годинава по предлог на техничкиот министер за внатрешни работи Наќе Чулев.
Тој претходно работел во Единицата за специјални задачи на МВР „Тигар“, бил инструктор во Центарот за обука во Идризово и самостоен инспектор за крим-техника во СВР Велес, а бил и инспектор во обезбедување на ВИП-личности и објекти.
Ангеловски е најмладата жртва на ковид-19 во Велешко. Во овој регион од почетокот на пандемијата починале 27 лица.